Kryetarja e Këshillit të Lartë Gjyqësor (KLGJ) Naureda Llagami u shpreh e pakënaqur të premten në komisionin parlamentar të Ligjeve për buxhetin e parashikuar nga qeveria për këtë sistemin gjyqësor.
Ajo tha se buxheti i akorduar në projekt-buxhet ishte 6 herë më i vogël se ai i kërkuar nga KLGJ-ja dhe se nuk ishin parashikuar fonde për zbatimin e Hartës së re Gjyqësore.
“Kemi kërkuar buxhet për zbatimine një projekti madhor si Harta Gjyqësore, por nuk e kemi atë mbështetje që do të donim”- tha Llagami duke theksuar disa herë se buxheti i kërkuar i dedikohej studimeve për instrastrukturën e godinave të reja të gjykatave.
“Godinat ekzistuese nuk plotësojnë standardet për zbatimin e hartës që nis implementimin nga shkurti 2023”- tha ajo duke sjell si shembull Gjykatën e Apelit Tiranë, ku do të duhen ambjente për të akomoduar 78 gjyqtarë dhe një trupë këshilltarësh ligjore.
Kryetarja e KLGJ-së tha se buxheti për zbatimin e hartës është bërë në bashkëpunim me Prokurorinë e Përgjithshme dhe i kërkoi komisionit të kishte parasysh rëndësinë e fondeve për nisjen e implementimit të hartës së re.
Kryetarja e Komisionit Klotilda Bushka e cilësoi të drejtë kërkesën dhe i kërkoi ministrisë së Financave që të ulet me KLGJ-në dhe relatorin e buxhetit në komision dhe të rakordohen shifrat deri në miratimin nen për nen të projekt-buxhetit.
Ndërsa deputetët e opozitës ngritën pyetjen se si mund të miratohet harta e re gjyqësore pa parashikimin e një buxheti për realizimin e saj.
“Kur u miratua harta ju kemi pyetur dhe thatë që keni dakordësinë e qeverisë për financimin e zbatimit të saj, tani thoni ska parashikim në buxhet?”- tha Enkelejd Alibeaj.
Përfaqësuesja e Ministrisë së Financave Vilma Çausholi mbrojti projeksionet e buxhetit dhe tha se për sistemin gjyqësor kishte rritje me 8% për vitin 2023.
“Për godinat është një vlerë 826 milionë po është e shtrirë në disa vite”- tha ajo, por shtoi se do të rishikoheshin dhe një herë shifrat deri në miratimin e tij.
Llagami u ankua dhe për fondin e ndërtimit të një godine të re për Gjykatën e Lartë.
“Zëri i buxhetit për Gjykatën e Lartë është miratuar në vitin 2022 por kemi vështirësi për të gjetur truallin dhe fondet i përdorëm për krijimin e hartës gjyqësore”- tha ajo, duke i kërkuar Ministrisë së Financave që ta njohë sërish si zë buxhetor në vitin që vjen.
/Reporter.al/
