Aksidenti tragjik i ndodhur në Itali, ku humbën jetën një nënë e re shqiptare së bashku me djalin e saj 2 vjeç dhe motrën e vëllain e mitur, po trajtohet si vrasje nga skuadra e hetuesve, të cilët akuzojnë drejtuesin e mjetit Orjol Lame si përgjegjës.
Sipas mediave italiane, Lame që drejtonte makinën dyshohet se shkaktoi aksidentin me vdekje të bashkëshortes, djalit të tij dhe dy kunetërve pasi testet toksikologjike treguan që në momentin e përplasjes së frikshme me banesën e braktisur, 32-vjeçar ishte i dehur dhe nën efektin e lëndëve narkotike.
Aksidenti i rëndë shkaktoi vdekjen e gruas së tij, Shane Hyseni, 22 vjeçe, djalit të tyre, Mattias Lame, rreth 2 vjeç dhe motrës e vëllait të 22-vjeçares, 8 e 11 vjeç.
Ndërkohë, raportohet se i riu shqiptar ka qenë i skeduar nga policia italiane, pasi ishte arrestuar dy herë gjatë dy viteve të fundit.
Në prill të 2020 kur ishte 28 vjeç ai përfundoi në pranga për shpërndarje droge, pasi karabinierët në Sant’Ilario e kapën me kokainë, heroinë dhe morfinë.
Lame u arrestua asokohe në flagrancë teksa shkëmbente drogën me një klient, ndërsa në celularin e tij kishte telefonata nga klientë të ndryshëm që kërkonin lëndë narkotike.
Herën e dytë, në shkurt të 2021, ai u arrestua në Campoformido. Karabinierët e arrestuan ndërkohë që gjendej në makinë bashkë me një 51-vjeçar nga Parma, i skeduar nga autoritetet.
Sakaq, ndaj Orjol Lames kishte një urdhër dëbimi lëshuar në vitin 2020 nga autoritetet në Reggio Emilia, vendim sipas të cilit 32-vjeçari nuk duhej të kthehej në Itali para vitit 2025.
Por edhe në këtë rast i riu shqiptar ishte lënë i lirë në pritje të dëbimit të tij nga territori italian.
Sipas hetimeve, Lame rezulton edhe në listën e personave që nuk do të mund të merrte kurrë një patentë italiane, por mbrëmjen e 30 tetorit kur ndodhi tragjedia ai po drejtonte automjetin që ishte i pasiguruar dhe në emër të një personi që kishte ndërruar jetë.
Si pasojë e aksidentit tragjik, Lame ndodhet në reanimacion në gjendje të rëndë shëndetësore.
