Problemin e krijuar në Britaninë e Madhe me emigrantët e paligjshëm shqiptarë që zbarkojnë në ishull pas një udhëtimi të vështirë me gomone përmes kanalit të “La Manshit”, kryeministri Edi Rama e sheh si sfidë të autoriteteve atje dhe jo të Shqipërisë.
Në një valë reagimesh në Twitter dhe më pas në një intervistë për BBC, kryeministri i është përgjigjur “flakë për flakë” deklaratave të ministrave britanikë, kryesisht atyre të Ministres së Brendshme Suella Braverman, e cila ka atakuar në çdo dalje publike azilkërkuesit shqiptarë.
Për Ramën retorika e krimit që po përdor Britania e Madhe për të shënjestruar shqiptarët si shkaktar të problemeve të politikave të emigracionit (të dështuara), që ka hartuar qeveria është e gabuar dhe po nxit ksenofobinë.
Rama për BBC tha se deklarata e Braverman këtë javë se “Britania e Madhe po pushtohet ka nxitur ksenofobinë” dhe “kjo lloj gjuhe nuk është një politikë e as një program”.
Proud of you @armandobroja9 and proud of every Albanian working hard and contributing to the UK! Shame on whoever singles out our great community there, turning all of you into a target for something Albanians have neither created nor are responsible for how bad is being handled. pic.twitter.com/C9p0zMLvY2
— Edi Rama (@ediramaal) November 3, 2022
Por, shefi i qeverisë nuk është ndalur me kaq. Pasi i kërkoi Britanisë të ndjekë shembullin e Gjermanisë që zgjidhi nëpërmjet legjislacionit të saj problemin e azilkërkuesve disa vite më parë, kreu i qeverisë ka postuar në Twitter një video të sulmuesit të kombëtares dhe ekipit anglez të Chelsea, Armando Broja.
Ky i fundit në konferencën për shtyp përpara sfidë me Dinamon e Zagrebit u pyet nga gazetarët për një qëndrim të tijin lidhur me problemin e azilkërkuesve shqiptarë dhe deklaroi se është krenar që vjen nga Shqipëria dhe se me çështjen në fjalë duhet të merren autoritetet.
Ndërkohë, Rama përkrah videos thekson se në Britaninë e Madhe jetojnë dhe punojnë në mënyrë të ndershme mijëra shqiptarë, të cilët kanë investuar me mund e djersë në ekonomi e shkollim, ndaj nuk duhet të nxihet imazhi i tyre me etiketimet e bëra së fundmi nga ministrat e qeverisë Sunak por dhe media vendase.
“Krenar për ty @armandobroja9 dhe krenar për çdo shqiptar që punon shumë dhe kontribuon në MB! Turp për këdo që veçon komunitetin tonë të madh atje, duke ju kthyer të gjithëve në shënjestër të diçkaje që shqiptarët as e kanë krijuar dhe as nuk mbajnë përgjegjësi për sa keq po trajtohet”, shkruan Rama.
