Çështja e shtetasit indian Nitin Mishra, i cili u arrestua në aeroportin “Nënë Tereza” më 14 tetor nga Policia e Shtetit në bashkëpunim me DEA-n amerikane, ka mbërritur deri në zyrën e kryeministrit të Indisë.
Gjykata e Tiranës e la në burg Mishran deri sa ai të ekstradohet drejt SHBA, pasi mbi të rëndojnë dy urdhër arreste ndërkombëtare të lëshuara nga dy gjykata të ndryshme për trafik narkotikësh në Amerikë.
DEA ra në gjurmët e 31-vjeçarit indian përmes infiltrimit të një agjenti, i cili la takim në Tiranë me të, duke e prangosur më pas në Rinas nën akuzën e trafikut të lëndëve narkotike, e kryer në formën e grupit kriminal.
Por sipas CNN-Neës18, indiani Mishra është një biznesmen nga rajoni i Uttar Pradesh që mbahet në Shqipëri për “ngatërrim identiteti” dhe familja e tij kërkon lirimin duke i shkruar edhe letër kryeministrit indian.
Konfuzioni mbi identitetin e një biznesmeni me bazë në Lucknow e çoi atë në burg në kryeqytetin shqiptar të Tiranës muajin e kaluar. Sipas zyrtarëve, Nitin Mishra u arrestua në tetor në Shqipëri me akuzën e trafikut të drogës. Familja e Mishras pretendon se ai u arrestua për shkak të një ‘gabimi me identifikimin’ dhe foli për CNN-Neës18 duke kërkuar drejtësi.
“Një avokat i të drejtave të njeriut me bazë në Mbretërinë e Bashkuar, Harjot Singh, tha se pasi autoritetet shqiptare arrestuan Mishra, familja e tij dhe konsullata indiane atje dyshohet se u mbajt në terr informativ për vendndodhjen e tij për më shumë se dy javë”, raporton The Times of India.
Familja e Mishras bën thirrje për drejtësi dhe tha se tani i kanë shkruar zyrës së Kryeministrit Narendra Modi duke kërkuar një ndërhyrje nga zyrtarët për “të mbrojtur të drejtat e qytetarëve indianë”.
Sipas familjes, Nitin u arrestua dyshohet se në një operacion të përbashkët nga policia shqiptare dhe DEA e qeverisë amerikane për një çështje droge. Familja pretendon se nuk e kishin idenë për arrestimin e tij për ditë të tëra dhe thuhet se kishin marrë vesh për arrestimin e Mishras vetëm pasi kishin lexuar lajmet.
Familja e Mishras përdori lidhjet e saj për të kontaktuar me një avokat tjetër në Mbretërinë e Bashkuar, i cili tha se ekipi i tij kishte paraqitur një ankesë pranë autoriteteve shqiptare për Nitinin që dyshohet se nuk i ishte ofruar avokat deri më tani.
“Ai duhet të ketë një përfaqësim të drejtë në një gjykatë”, tha Singh. “Përshtypja e parë, duket se është një rast i një identiteti të gabuar, ose kredencialet e tij janë vjedhur dhe ai është inkuadruar”, tha avokati Singh me bazë në Mbretërinë e Bashkuar për TOI.
