Gazetari Artan Hoxha ka zbuluar sot detaje mbi jetën e luksit të bosëve shqiptarë të krimit që jetojnë në Dubai, duke thënë se shfrytëzojnë në maksimum të mirat materiale që u siguron ky Emirat dhe faktin që janë të paprekshëm nga ligji i ekstradimit.
Sipas tij grupet shqiptare janë përfshirë në botën e biznesit në Dubai duke investuar në pasuri të paluajtshme, agjenci imobilare dhe forma të tjera të ligjshme, me shumën totale të derdhur prej tyre që shkon në 1 miliardë dollarë.
“Një gjë që më bëri përshtypje ishte se nuk punonin me karta, por me cash. Kjo do të thotë që askush nuk do t’ia dijë se nga i ke gjetur këto para. Zakonisht krimi i organizuar nuk mban para në bankë. Me atë fuqi që kanë ata atje blejnë jo zgjedhjet lokale që kemi ne këtu…Shqipëria sot, kupolën drejtuese të krimit të organizuar nuk e ka më në Shqipëri. Të gjithë ata që janë në nivele që i njohim, i kemi në kërkim, s’i njohim fare dhe mund të mos i njohim kurrë, janë në Dubai. Ata kanë investuar në Shqipëri dhe kanë lidhje shumë të fuqishme këtu”, tha Hoxha.
Gazetari zbulon se ka pasur komunikim me disa prej tyre dhe pyetja që i kanë drejtuar është se çfarë do të ndodhë me amnistinë fiskale, sepse nuk duan që t’i lënë ato para në Dubai.
“Për sa kohë që Dubai do të funksionojë me këtë mënyrë, ne kemi shanse zero për t’i goditur grupet që ndodhen aty. Perspektiva ishte jo optimiste dhe informacioni që ishte aty ishte i nivelit sipëror. Atje mund të merrje vesh jo vetëm për ngjarjet në ndodhin në Shqipëri, por edhe për ngjarjet që do të ndodhin”, shtoi ai.
Hoxha gjithashtu tha se shqiptarët që ishin në shumë vende të ndryshme në kërkim për krime të rëndë dhe trafik droge lëviznin të lirë nëpër luksin e Dubait, madje duke përdorur makina të blinduara e luksoze që kushtojnë nga 200 deri në 800 mijë euro.
Hoxha ka theksuar se Dubai njihet si “Parajsa Penale” dhe si “Parajsa Fiskale”, pasi sipas ligjeve të këtij emirati, askush nuk të kërkon llogari se si i ke fituar paratë apo se çfarë të kaluare ke, mjafton që paratë t’i investosh në mënyrë të rregullt.
“Të gjitha parat i investon pa dhënë llogari. Do zbatosh vetëm rregullat e emiratit të Dubait. Shtetësi ata nuk të japin. Shqiptarët lëviznin me mjete të blinduara 200-800 mijë euro”, theksoi Hoxha.
Sipas Hoxhës bosët në Dubai marrin me vete edhe vajzat e “Showbizit” shqiptar në mënyrë që të shijojnë luksin ashtu siç kanë dëshirë, ndërsa disa prej tyre kanë marrë me vete familjet duke u zhvendosur përfundimisht.
“Ata marrin edhe vajza të ShowBizit. I kanë mundësitë financiare, duan ta shijojnë jetën. I kanë thirrur ata të gjithë atje”, pohoi ai.
