Dështimi i negociatave për bashkim midis Partisë Demokratike dhe grupit të deputetëve të udhëhequr nga Enkelejd Alibeaj ka ngritur dilemën se kush prej tyre do të regjistrohet me logon e kësaj force politike në zgjedhjet lokale të 14 majit.
Për të hedhur dritë mbi procedurën e regjistrimit të partive politike, “Opinion” transmetoi një reagim të Komisionit Qendror të Zgjedhjeve ku sqarohet se për regjistrimin duhet mes të tjerash edhe një vërtetim nga Gjykata e Rrethit Gjyqësor në Tiranë.
“Partia që kërkon të regjistrohet si subjekt zgjedhor në KQZ ka detyrimin te paraqesë në këtë institucion, krahas të tjerave, një vërtetim nga Gjykata e Rrethit Gjyqësor, Tiranë. Sipas ligjit për partitë politike është kjo gjykatë e cila mban Regjistrin e Partive Politike. Ky regjistër sipas këtij ligji përmban krahas të tjerave: Numrin rendor të regjistrimit; Emrin e plotë të partisë; Inicialet e partisë Stemën e partisë dhe emrin e kryetarit të partisë. Këto elemente i përmban/duhet ti përmbajë vërtetimi i Gjykatës së Rrethit Gjyqësor Tiranë i cili depozitohet në KQZ kur kërkohet të bëhet regjistrimi i partisë si subjekt”, thuhet në reagimin e KQZ-së.
Teksa vendimi final për “Vulën” e Partisë Demokratike mund të jepet në seancën e nesërme gjyqësore në Gjykatën e Apelit, kujtojmë se në zgjedhjet e pjesshme të 6 marsit kreu aktual i PD, Sali Berisha u regjistrua në zgjedhje nën siglën e LSI-së.
Edhe pasi Basha dha dorëheqjen pas atyre zgjedhjeve dhe gjykata e Tiranës njohu më 25 mars statutin e Berishës, ende në regjistër Basha figuron kryetar i PD-së dhe do të jetë Apeli që do të thotë fjalën e fundit me një vendim të formës së prerë.
