Dy të rinj janë vënë në pranga nga policia e Korçës, pasi rezultonin të shpallur në kërkim dhe të dënuar nga gjykata.
Më konkretisht, në pikën kufitare të Kapshticës është vënë në pranga 21-vjeçari Melinor Pinderi pasi rezultonte i dënuar për dhënien e ndihmës për kalim të paligjshëm të kufirit.
“Shërbimet e Stacionit të Policisë Kufitare Kapshticë, në dalje të Republikës së Shqipërisë, bënë ndalimin e shtetasit në kërkim Melinor Pinderi, 21 vjeç, banues në fshatin Vinçan, Korçë, pasi Gjykata e Apelit Tiranë, me vendimin e datës 14.12.2021, e ka dënuar me 3 vjet e 4 muaj burg, për veprën penale “Ndihma për kalim të paligjshëm të kufijve”. Veprimet e mëtejshme procedurale do të kryen nga Drejtoria Vendore e Policisë Tiranë”, thuhet në njoftimin e Uniformave Blu.
Sa i përket personit tjetër, ai është një 27-vjeçar i cili duhet të kryejë dënimin me 4 muaj burg për grabitje.
“Specialistët për Hetimin e Krimeve të Komisariatit të Policisë Maliq bënë ndalimin e shtetasit në kërkim F. R., 27 vjeç, banues në fshatin Podgorie, Maliq, pasi Gjykata e Rrethit Gjyqësor Korçë, me vendimin e datës 02.12.2019, e ka dënuar me 4 muaj burg, për veprën penale “Vjedhja””.
