Në takimin me krerët e degëve të qarkut Tiranë, Kryetari i Partisë Demokratike Sali Berisha ka hedhur akuza ndaj kryeministrit Edi Rama. Gjatë fjalës së tij, kryedemokrati Berisha është shprehur se Kryeministri Rama “ka tejkaluar, ligje, kushtetutë, norma morale dhe çdo gjë dhe i ka bërë shqiptarët të huaj në vendin e tyre”.
“Urdhëroni se ç’bën me pedagogët, e diskutuam edhe në një mbledhje tjetër. Paguan shoferin e Fondit Shqiptar të Zhvillimit, 4 herë më shumë se një pedagog. Kjo është e qëllishme, si të largojmë edhe këta mësimdhënës nga Shqipëria dhe të mbyllim universitetet, ti shuajmë. Ky po krijon pasuri përrallore për veten e tij. A e dini ju se sot në Shqipëri nuk jepet një leje ndërtimi me sipërfaqe më shumë se 200 metra pa firmën e kryeministrit. Ju garantoj se një centralizëm i tillë nuk ka ekzistuar kurrë edhe në diktaturën më të egër që ka pasur Europa dhe ka qenë ajo e Enver Hoxhës. Kjo është vetëm si të vjelësh ryshfete në të 4 anët e Shqipërisë. Ky njeri i ka tejkaluar, ligje, kushtetutë, norma morale dhe çdo gjë. Rama i ka bërë shqiptarët të huaj në vendin e tyre. I thoshte nxënësi në Kolonjë, shkollën e meremetove, por brenda bankat janë si janë, sepse vetë udhëton me çarter. Internet nuk kemi, sepse blihen instilacione 4 milionë. A mundet një njeri të tallet me një popull në këtë mënyrë, nuk mundet. E them edhe njëherë, tani jemi në betejë dhe secili demokrat e demokrate, duhet ta konsiderojë se ne jemi në betejë”, tha Berisha.
Kryedemokrati Berisha u ka thënë krerëve të qarkut Tiranë se do të fitojnë sepse siç u shpreh, ata kanë një kauzë të drejtë. Kryetari i PD-së Berisha thotë se beteja që ata do të nisin nuk do të jetë e thjeshtë, por do të fitojnë pasi sipas Berishës, po mbrojnë interest jetike të shqiptarëve.
“Rama punon ditë e natë me Vuçiçin. Çfarë bën tani, falimenton krejt industrinë e birrës. Absolutisht nuk ka vend në botë që e bën këtë, përveç këtij dhe e bën për vëllezërit Karriç, e bën për birrën e Beogradit, Ballkanin e Hapur. Se janë 1 mijë e ca familje që ushqehen dhe marrin rrogat në këtë industri dhe që janë qindra milionë të investuara, kjo nuk ka rëndësi për të. Për të ka rëndësi se sa e peshojnë në para vëllezërit Karriç, kompani të sanksionuara nga BE-ja, për lidhje të ngushta me Llukashenkon në Bjellorusi. Tani duhet ta pësojnë këtu edhe 1 mijë familje të tjera, e të nisen me gomone ku t’i çojë fati. Nuk mund të tolerohet më. Le të thotë ç’të dojë. Do të përballet me shqiptarët. Ne tani nisim betejën, kjo nuk është betejë e thjeshtë, por do të fitojmë sepse kemi një kauzë të drejtë dhe po mbrojmë interesa jetike, jo tonat, jo personale, por të çdo qytetari shqiptar. Përveç klubit të hajdutëve rilindas, ata jo. Ata janë për t’u marrë një e nga një dhe për të shkuar atje ku e kanë vendin, me në krye Edi Ramën”, tha Berisha.
