Publikimi i të dhënave për hyrje-daljet në Pikat Kufitare nga hakerat iranianë të HomelandJustice, që zbuluan se nga 2013 kur u zgjodh kryeministër Edi Rama ka “qëndruar” më shumë në “ajër” se në tokë me avionë charter, duket se ia ka prishu qetësinë shefit të qeverisë.
Gjithashtu shifrat e publikuara nga rivali i tij politik Sali Berisha, ku rezulton se për 137 fluturime nga kryeministri mund të jenë paguar deri në 19 milionë euro, kanë bërë që Rama prej 5 ditësh të nisë një fushatë sulmesh në tentativë për t’u justifikuar.
Edhe sot, kreu i ekzekutivit e ka nisur ditën duke sulmuar opozitën dhe mediat për publikimin e shifrave të “çmendura” që kanë kushtuar fluturimet e tij, duke shkruar në Twitter se kemi të bëjmë me shpifje përkundrejt tij.
“I Zot të qash a të qeshësh, vetëm këtu bën vaki të të dyndin me shpifje dhe të të thonë bëj transparencë! Po si bëhet kjo transparenca kur u tregon shifrat dhe bëjnë sikur nuk kuptojnë?! Po kur thonë pse i bën reklamë Shqipërisë? Po kujt t’i bëj, kanaleve, portaleve apo rublave?!”, shkruan Rama.
Kryeministri nuk i del inati as me ata që kanë nisur ta cilësojnë si diktator, duke i krahasuar kostot e fluturimeve të tij me ato të manjatëve Rusë apo sheikëve të Lindjes së Mesme.
Rama rreket të mbrohet duke thënë se të gjitha qeveritë e BE apo edhe të rajonit kanë avionët e tyre privat, por Shqipëria nuk e blen dot një.
“Lëre pastaj kur thonë me charter udhëtojnë vetëm sheikët e diktatorët, ndërkohë që tërë qeveritë e rajonit, se Europës po e po, kanë avionët e tyre përjashto Shqipërinë e Kosovën! Ne s’e blejmë dot,me qera s’e marrim dot, ndaj kemi blerë orë fluturimi me marrëveshje promocionale! Po ku është hilja thonë se s’ka mundësi?! Ka si s’ka! Hilja është ashiqare fare tek përpjekja non stop për ta helmuar, çoroditur, nxitur për sherr e për konflikt këtë popull me shpifje sa më të përbindshme, nisur nga gjysëm të vërteta që janë edhe gënjeshtrat më të mëdha!”, nënvizon ai.
Por, kryeministri harron se ishte “Ismaili” që “Air Albania” i ka vendosur atij në dispozicion sipas kontratës milionëshe që kanë firmosur, që i transportoi atë dhe Dritan Abazoviç e Dimitar Kovaçeskin në vizitën zyrtare në Kiev në qershor, pasi krerët e Malit të Zi dhe Maqedonisë së Veriut nuk kanë në dispozicion një avion privat si i pari i Shqipërisë.
