Pesë ndeshje dhe po kaq fitore për Partizanin në Superligën e volejbollit të meshkujve. Fitorja e radhës për ekipin që drejtohet nga Ylli Tomorri erdhi të shtunën në kryendeshjen e javës së pestë ndaj Erzenit, takim në të cilin “demat” triumfuan 3-1 (16-25, 25- 17, 25-21, 25-16).
Pas një seti të parë më të mirë për shijakasit, Partizani mori kontrollin e lojës, për të realizuar edhe përmbysjen. Edhe këtë herë spikati Osman Qepa, i cili bëri një tjetër takim të madh, duke realizuar 24 pikë, i mbështetur nga Izuchukwu Oforah me 22.
Për Erzenin më produktivët ishin të zakonshmit Asmend Kula dhe Anis Çullhaj, përkatësisht me 17 dhe 16 pikë.
Fitore edhe për Tiranën, teksa kampionët në fuqi kaluan Teutën në “Farie Hoti” me rezultatin 3-0 (25-15, 25-23, 25-21). Nahuel Lapera me 20 pikë dhe Ledion Martiro me 16, ishin më të mirët në radhët e bardhebluve.
Skënderbeu mori një triumf me përmbysje ndaj Studentit në shifrat 3-1 (19-25, 29-27, 27-25, 30- 28). Një sfidë shumë e luftuar, me plot tri sete që shkuan në pikët shtesë. Klaudjo Barçi me 25 pikë ishte më i miri për Skënderbeun, ndërsa për Studentin nuk mjaftuan 28 pikët e Armando Gaxirit.
Ndërsa Vllaznia mundi lehtësisht Elbasanin 3-0 (25-18, 25-21, 25-20).
