Prej dy javësh pedagogët vijojnë bojkotin e mësimit në universitete, pasi qeveria nuk ka plotësuar kërkesat e tyre, mes të cilave rritja e pagave për të dhe stafin ndihmës si dhe rritja e financimit për kërkimin shkencor.
Sindikata e punonjësve të universiteteve njofton se do vazhdojnë me protestën sa të plotësohen kërkesat.
Kështu ata kanë lajmëruar se protesta e radhës do të mbahet ditën e hënë më datë 31 tetor, në orën 11:00 përballë Korpusit Universitar të UPT.
“Përshëndetje të nderuar pedagogë, Ditën e hënë, dt 31.10.2022, ora 11.00. Para Korpusit qendror të UPT Protestë kombëtare e pedagogëve organizuar nga Sindikata e punonjësve të universiteteve!! Lutemi për mbështetje maksimale nga të gjithë pedagogët, të të gjitha Universiteteve. Është e nevojshme prania e përfaqësive të cdo universiteti jo vetëm nga Tirana, por edhe të degëve. Protesta e të hënës është shumë e rëndësishme!!”, thuhet në njoftimin e bërë.
Kërkesat e pedagogëve drejtuar qeverisë:
Rritje 50 për qind të pagave bazë sipas titujve shkencorë në dy faza.
Vlerësime për vjetërsinë në punë mbi 15 vjet dhe për orët e mbingarkesës shtesë në mësimdhënie.
Rritje të financimit për kërkimin shkencor, rivlerësim të orës mësimore leksion e seminar.
Rishikim të tatimit prej 23% mbi pagesën e ngarkesës shtesë.
Transparencë mbi buxhetin dhe të ardhurat e universiteteve publike.
