Deputeti i Partisë Demokratike, Belind Këlliçi u shpreh se do të jetë i drejtë si në rast fitoreje por edhe në humbje në procesin e Primareve brenda selisë.
Në një prononicim gjatë emisionit “Log.”, Këlliçi tha se do të njohë çdo rezultat madje më pas do të bëjë edhe fushatë për të kundër kryebashkiakut aktual të Tiranës, Erion Veliaj.
“Për fat të mirë në rastin tim, ke të bësh me një politikan që i ka provuar shijet e fitores dhe të humbjes. Nuk kam hedhur baltë mbi procese dhe kam njohur edhe fitoren dhe humbjen. Kam përshëndetur garuesit dhe kam qenë krah tyre në Parlament. Do njoh çdo rezultat, nuk i bëj bisht garës. Çdo garë prodhon konflikt dhe debat, por duke qenë se kandidaturat që flitet deri tani janë të spikatura dhe janë qytetare. Janë vlerë për PD dhe kushdo që do të fitojë. Edhe ai me pak vota është më i mirë se Veliaj. Unë nëse futem dhe shpallem fitues, të parëve dorën do ua shtrij rivalëve në garë. Nëse unë nuk fitoj kushdo që do të fitoj, do i shtrëngoj dorën dhe nga ajo datë deri me 12 Maj unë do jem në fushatë kundër Erion Veliajt,”-tha Këlliçi.
