Klubi i Napolit vazhdon të ndjekë ligjërisht ish-lojtarët e tij, të cilët refuzuan që të merrnin pjesë në një grumbullim stërvitor pas një humbje në Ligën e Kampioneve përballë Salcburgut.
Prej më shumë se një viti, napolitanët kanë nisur kallëzimet penale ndaj lojtarëve që nuk kanë pranuar gjobat që erdhën asokohe si pasojë e vendimit të futbollistëve, mes të cilëve edhe Elseid Hysaj.
Por ai që e ka paguar më shtrenjtë mosbindjen edhe ish-mesfushori Allan, i cili raportohet se i është vërsulur djalit të presidentit De Laurentis me fyerje.
Gjykata e Apelit ka mbajtur në fuqi vendimin e gjykatës së shkallës së parë në Napoli, e cila vendosi që ai të paguante një gjobë prej 170 mijë eurosh. Gjykata konfirmoi se Allan i ishte vërsulur Edo De Laurentis dhe vetëm ndërhyrja e drejtorit sportiv Xhiuntoli, kishte shmangur përplasjen. “Duhet t’i thuash babait tënd që 100 mijë eurot mund t’i futni te ai vendi”, ishin fjalët e Allanit.
Avokati i klubit, Matia Grasani, deklaroi sot se Allan refuzonte të paguante gjobën, ndaj Napoli po merrte masa që ta ndiqte në Dubai, ku luan për Al-Uahda, dhe t’i marrë çdo pronë që ka atje. “Nuk do të humbim asnjë ditë për të vepruar, pasi futbollisti ka bërë të ditur se atë shifër vështirë se do ta paguajë. Jemi të gatshëm të nisemi për në Dubai dhe nëse do të ketë ndonjë gjë për të sekuestruar, nuk do të ndalemi, pasi sjellje të tilla duhen përndjekur, përndryshe këta personazhe nuk do të kuptojnë kurrë çfarë është respekti dhe mirënjohja ndaj atij që të ka dhënë shumë, Klubi është gati të kërkojë sekuestron e çdo gjëje që ka lidhje me Allan”, tha avokati.
