Edhe pse është afruar me grupin e kryedemokratit Sali Berisha, deputeti demokrat Xhelal Mziu deklaron se është kundër procesit të primareve për përzgjedhjen e kandidatëve për zgjedhjet lokale të vitit të ardhshëm.
Në një intervistë për “Ora News”, Mziu u shpreh se mendon se pikësëpari duhet bërë një parakonkurrim dhe pastaj të gjendet një zgjidhje me sondazhet selektive se kush mund të jetë kandidatura.
“Në pushtetin vendor ka të bëjë shumë individi. Personat që janë certifikuar ndër vite dhe kanë mandate që e tejkalon madhësinë e një bashkie nuk duhet të jenë raste përjashtimore. Kam qenë kundër edhe në vitin 2020 kur ka qenë kryetar Basha dhe prodhuan një rezultat të padëshiruar, sepse ata që mendonin se ishin inferiorë i orientonin votat kundër kolegëve të tjerë. Unë jam kundër primareve, pasi duhet bërë një parakonkurrim dhe pastaj të gjendet një zgjidhje si sondazhet selektive se kush mund të jetë kandidatura,”-tha Mziu.
Më pas, Mziu shton se pavarësisht se mund të krijojë një frymë në elektorat, primaret në thelb nuk zgjidhin krizën mes demokratëve por vetëm thellojnë përçarjen brenda PD-së.
“Nuk më është dhënë mundësi që ta them këtë gjë në mbledhjet e PD-së të mërkurën e kaluar. Këto i kam shprehur në mënyrë permanente. Pavarësisht se jepet një frymë, nuk mendoj se është zgjidhja më e mirë, pasi fut në një konflikt të ri. Për mua zgjidhja më e mirë është një sondazh për të mos krijuar konflikte dhe për të pasur kohë të mjaftueshme, sepse së paku deri në dhjetor duhet të dalin listat e kandidatëve.”
