Vijimi i bojkotit nga ana e pedagogëve dhe protesta kombëtare e radhës që është paralajmëruar duket se ia kanë “prishur gjumin” kryeministrit Edi Rama.
Kjo pasi kreu i qeverisë e ka nisur ditën duke sulmuar sërish kreun e Sindikatës së Pedagogëvem Sandër Kovaçi, teksa nuk ia ndan etiketimin si ish-bashkëpunëtor i Sigurimit të Shtetit.
Nga takimi me fermerët në Fier, Rama tha se nuk i është rritur askujt më shumë rroga sesa pedagogëve duke mbrojtur vendimin e Këshillit të Ministrave për shtesën 7%.
“Kujt i janë rritur më shumë pagat? Pedagogëve, askujt me përjashtim të policisë, një pjese të punonjës së bazës, askujt sa i janë rritur pedagogëve. Çfarë duan ata? 15%, 7% qeveria 8% i rritën vetë se janë autonomë. Ka fakultete të tëra që nuk e kanë ndërprerë mësimin, këta janë një pakicë nën drejtimin e një SHIK-si një figure të SHIK-ut që e thotë me krenari që ka qenë në SHIK. Le të jetë krenar sa të dojë se nuk kemi cfarë bëjmë e të një grushti të një grupi, të një turme që nga foltorja del në dyert e universiteteve e bën shfaqje sikur brenda po bëhet nami. Rritja e pagave nuk është e mjaftueshme për të thënë rrini të qetë tani e mos kërkoni se nuk ka për të ndenjur të qetë ndërkohë që lufta ka sjellë një inflacion”, tha Rama.
