Videot e shfaqura këtë të Shtunë në media shtojnë akoma edhe më shumë dyshimet se policia veproi në mënyrë joprofesionale në rastin e Lear Kurtit, i cili humbi jetën pas ndalimit nga uniformat blu.
Pas pamjeve të publikuara ka reaguar edhe ish-kryeministri Sali Berisha, i cili e cilëson vdekjen e të riut “mbytje shtetërore”.
Berisha vë në dukje se ndryshe nga sa ç’deklaroi Agjencia e Mbikqyrjes Policore, nga pamjet duket se Kurti nuk u ndalua pasi qëndronte pranë një biznesi, por ndiqet nga policia pasi pikaset duke ecur me telefon në vesh.
“Fakte të reja tronditëse me mbytjen shtetërore të 32 vjeçarit, Lear Kurti. Dalin skenat e ndjekjes dhe keqtrajtimit me të cilin banditë me uniformë i morën shpirtin në rrugë të riut, Lear Kurti. Del dhe mashtrimi tjetër i kriminelit me uniformë, Ardi Veliu i cili mashtroi publikun duke deklaruar se i riu u ndalua nga patrulla se po qëndronte i dyshimtë para një dyqani! E vërteta, i ndjeri nuk po qëndronte por po ecte i vetëm në rrugë duke biseduar në telefon. Këta janë bandë kriminale! Mashtrimet e bandës me uniformë të Rama-Çuçi”, shkruan Berisha në një postim në FB.
Autoritetet po ashtu kanë raportuar se Kurti është transportuar në komisariat pas ndalimit. Por, duke parë gjendjen e tij nga pamjet, ku shfaqet pa ndjenja, mbetet e pakuptueshme se pse nuk është lajmëruar ambulanca në mënyrë që i riu të transportohej menjëherë në spital.
Ndoshta një ndërhyrje e shpejtë mjekësore mund t’i kishte shpëtuar jetën.
