Shoqëria Civile ka njoftuar ditën e sotme se në orën 20:00 do të mblidhen për të protestuar para Ministrisë së Brendshme. Protestas ka në fokus vdekjen e Lear Kurtit.
Nën moton ‘Kupa u mbush! Boll më me padrejtësinë, stop ekzekutimit të shqiptarëve’, të rinjtë do marshojnë për të protestuar pas vdekjes së 32-vjeçarit.
Protesta është njoftuar dhe nga kreu i Partisë Demokratike, Sali Berisha, i cili me anë të një postimi në FB, ka paralajmëruar për nismën e sotme.
‘Sot në ora 20:00 të gjithë në protestë para Ministrisë së Brendshme!’ shkruan Berisha.
Lear Kurti humbi jetën pasi u shoqërua nga efektivët në komisariatin nr.3. Ai u ndalua dy netë më parë, në orën 23:07 të mbrëmjes nga efektivët në rrugën “Riza Çuka” në Laprakë, por ka vrapuar.
Siç sqarohet në njoftimin e policisë, i riu është kapur pas ndjekje, është dërguar në komisariat, ku ka shfaqur problemet e para shëndetësore.
Ndërkohë që gjendja e të riut përkeqësohej, efektivët kanë vendosur ta shoqërojnë me automjetin e tyre në Spitalin e Traumës. Dyshimet e para të policisë ishte se ai kishte gëlltitur qesa me narkotikë.
Pas ekspertizës mjeko-ligjore, bëhet me dije se është vërtetuar se substanca e gjetur ishte e llojit kokainë.
I riu kishte arritur pak para se të kapej nga efektivët, të gëlltiste dy qese të vogla me një sasi kokaine brenda saj. Qeset janë të përmasave 5×5, të ngjashme me ato qeset që përdoren në farmaci për medikamentet.
Sipas ekspertizës, shkak i vdekjes të Kurtit është arrest kardiak i shkaktuar nga overdoza.
