Partia Socialiste nuk ka pritur shumë gjatë dhe nëpërmjet kreut të saj të Grupit, Taulant Balla ka depozituar sot në Kuvend dy amendamente të reja që do t’i ndalojnë kandidimin në poste publike, ish-bashkëpunëtorëve të Sigurimit të Shtetit.
Depozitimi i nismave vjen në kuadër të plotësimit të ligjit të ndryshuar për Hapjen e Dosjeve, i cili mori mbrëmjen e kaluar miratimin e Parlamentit nga bashkimi i votave të mazhorancës me grupin e deputetëve të Enkelejd Alibeaj.
Balla tha për mediat sot se dy nismat janë, ligji i dekriminalizimit dhe ajo për partitë politike, ku në lojë hyn edhe KQZ.
“Sot PS prezanton edhe dy nisma të tjera për ndalimin e personave me lidhje në të shkuarën me ish-sigurimin famëkeq. Janë dy nisma, e para ka të bëjë me ndryshimin e ligjit për integritetin e personave që zgjidhen dhe emërohen në funksione pulitke, ose ligi i dekriminalizimit dhe tjetra për partitë politike”, tha Balla.
Nisma e parë parashikon se nëse personi i cili mban poste publike verifikohet se ka qenë bashkëpunëtor i sigurimit përveçse i hiqet e drejta për ushtrim të funksionit ndiqet edhe penalisht.
Ndërsa nisma e dytë për ndryshimin e ligjit për partitë politike, parashikon që të privohen nga zgjedhja si kryetar të partive politike (ose të shkarkohen nëse janë në krye të tyre), personat me lidhje me ish-Sigurimin e Shtetit në të shkuarën e tyre.
I pyetur nga gazetarët nëse ndryshimi i këtyre ligjeve me kërkesë të PS ka për qëllim largimin e Ilir Metës nga politika, Balla tha se kreu i PL duhet të sqarojë pozicionin e tij pas miratimit të këtij ligji.
“Unë mendoj që Meta duhet të sqarojë pozicionin e tij pas miratimit të këtij ligji. Shqipëria, edhe pse pas 32 viteve. Mbrëmë ka pasur një vendimmarrje të rëndësishme. Në dobi të vendosjes së një paqeje sociale, sepse secili nga ne duhet të vendoset në mendjet dhe shpirtrave të familjeve që e kanë vuajtur regjimin. Ironia është se këto iniciativa po merren nga Partia Socialiste e Shqipërisë. Nuk ka asnjë lloj pazari, por nevojë për të reflektuar. Mungesa e dukshme e Sali Berishës, që u mundua të marrë deputetët e opozitës që të mos ishin prezent në votim, është provë se Berisha është komunisti i shndërruar në antikomunist”, shtoi ai.
