Pedagogët pas përplasjeve në distancë me kryeministrin Edi Rama dhe të gjendur përballë kokëfortësisë së kryeministrit për të mos negociuar kërkesat e tyre dhe sulmeve denigruese dhe shantazheve, ka vendosur të përshkallëzojnë bojkotin e auditorëve.
Ashtu siç kishin paralajmëruar ditën e djeshme, rreth orës 11:00 ata kanë nisur në ambientet e jashtme të Universitetit Politeknik protestën e tyre kombëtare, duke ia bërë të qartë shefit të qeverisë që “nuk i frikëson” me kërcënime.
Thirrjes për tubim të bërë dje nga Sindikata e Pedagogëve duket se ia janë përgjigjur edhe dhjetëra studentë, të cilët po protestojnë krah tyre.
Njëri prej pedagogëve që ka marrë fjalën, i ka kujtuar kryeministrit Edi Rama vitin 2004 kur ai dilte përkrah tyre për t’i mbështetur në tubime, sepse ishte në opozitë me kryeministrin e asaj kohe Fatos Nano.
Madje pedagogu shkoi më tej, teksa me ironi tha se Rama duhet të bëhet një ‘çerek burri’ dhe të rrisë pagat e akademikëve.
“Nuk kemi më kohë, durimit i ka ardhur fundi. Jetës sonë universitare po i bëhet gjëma dita ditës. Ndaj jemi mbledhur sot këtu për t’i dhënë shpresë jetës sonë akademike. Shpresa nis me rritjen e financimit. Me tërheqjen mbrapsht ë rritjes 8%. Shpresa nis kur të kemi autonomi universitare dhe jo qeveritare. Dua të theksoj se greva e 2004 u mbështet nga kryeministri i sotëm, por u tregua burrë një kryeministër tjetër duke dyfishuar pagat. Ndërsa sot nuk e mbështet protestën, dhe i bëj thirrje që të bëjë një çerek burri për të plotësuar kërkesa tona minimale”, tha ai.
