27-vjeçari shqiptar në Londër, Lumturi Zeqja u vra dy ditë më parë pasi ndërhyri për të shpëtuar shokun e tij që u përfshi në sherr në një lokal, shkruajnë mediet britanike.
Familjarët shprehen të tronditur nga humbja e papritur e të riut. Kushërira e tij, Violeta Uka ka thënë se Lumi ishte njeri i guximshëm dhe se nuk nguroi asnjë sekond të sakrifikojë veten për të shpëtuar shokun e tij.
“Ai hyri në mes të sherrit për të ndarë shokun e tij dhe ata e vranë atë. Ai ishte një njeri i guximshëm dhe i mirë, prandaj ndërhyri për të shpëtuar shokun e tij,” ka deklaruar kushërira e tij Violeta Uka.
I riu vdiq në vendin e ngjarjes, pranë një lokali në Leytonstone ndërsa një mik i tij rreth të 20-tave mbeti i plagosur. Lumturi Zeqja jetonte në Londër për 13 vjet dhe kushërira e tij e cilëson atë si një njeri punëtor.
“Na morën Lumin në moshën më të bukur. Nuk ka fjalë për ta ngushëlluar familjen,” tha ajo.
Policia britanike po heton në pista të ndryshme, por ende nuk është bërë asnjë arrestim për ngjarjen e rëndë.
