Përplasjet midis kryeministri Edi Rama dhe Sindikatës së Pedagogëve janë intensifikuar në dy ditë e fundit, kryesisht pas deklaratës së tij në mbledhjen me rektorët, ku tha se nuk do të ketë më në Shqipëri rritje uniforme të pagës së pedagogëve.
Në krahun tjetër, Sindikata u përgjigj sot duke njoftuar përshkallëzimin e bojkotit me protestë kombëtare ditën e nesërme para Universitetit Politeknik.
Kreu i saj Sandër Kovaçi dhe pedagogë të tjerë njëzëri shprehën shqetësimin se janë duke u shantazhuar për të hequr dorë nga bojkoti, ndërsa e cilësuan kërcënim thirrjen e Ramës ndaj agjencive tatimore për të bërë “Vetting” të pasurisë së tyre.
“Nuk i frikësohemi kryeministrit”, ishte një nga parullat që u lëshua sot nga pedagogët, ndërsa kreu i qeverisë iu është përgjigjur nga Gjirokastra duke sulmuar hapur dhe drejtpërdrejtë kreun e Sindikatës, Sandër Kovaçi.
Teksa tha se rritjen e pagës duhet ta harrojnë pasi nuk janë “as si pensionistët, as si mësuesit as policët dhe zjarrfikësit”, Rama tha se Sindikata e atyre që dalin të protestojnë drejtohet nga një anëtar i SHIK-ut.
“Ata pedagogët me një të SHIK-ut n krye që kërkojnë rritje page kur jo vetëm u është rritur por më shumë se të tjerët, që përveç qeverisë ua rrit autonomia. Autonomia është përgjegjësi, ata që dalin ta harrojnë rritjen, sepse do e kenë zjarrfikësit dhe pensionistët të parët. Mesazhi im është i thjeshtë, nuk jeni as si pensionistët, as si mësuesit as policët e zjarrfikësit. Jeni me autonomi, do e nxirrni vetë me projekte. Pjesa më e madhe e pedagogëve nuk dalin për të bërë selfie te dera për t’i nxjerrë mediat por janë në mësim”, u shpreh Rama.
Duke qenë se mbledhja e tij me rektorët dhe kërcënimet duket se nuk i trembën pedagogët, Rama duket se ka nisur strategjinë për anatemimin dhe shpërbërjen e kauzës së protestës, duke i cilësuar drejtuesit e saj si të lidhur me politikën dhe opozitën.
Kjo, pasi në fjalën e tij në Gjirokastër Rama shkoi më tej duke thënë se ata që sot po kërkojnë rritje pagash janë një “zinxhir foltorezhinjsh që çojnë ujë në mullirin e rublave”, duke iu referuar kështu Partisë Demokratike.
“Nuk mund të lësh pa mësim studentë dhe studente që prindërit paguajnë që të qëndrojnë atje, kur paga të është rritur. Si t’i themi zjarrfikësve dilni dhe ju dhe vini ndonjë zjarr. Pedagogët punojnë edhe në universitete private. Merrni më shumë se deklaroni dhe këto do i shikojmë. Jo për t’ju bërë vetting, Këtu dalin bërtasin ata që kanë më shumë. Po t’i qanin hallin të tjerëve do thoni janë mjaftueshëm se janë më shumë se zjarrfikësit që hidhen në zjarr çdo vit e më shumë. Një figurë e SHIK-ut famëkeq nuk mund të japë orientim dhe nuk mund të imponohet dot bashkë me një zinxhir foltorexhinjsh që kanë ngatërruar punën në universitet në foltore. Bëjnë protesta për të çuar ujë në mullirin e rublave dhe spiunëve dhe non-gratave. Le të bëjnë protesta kundër meje. Por të bësh protesta si skuth dhe të bësh sikur po shantazhojmë. Kush po i shantazhon këto?! Shantazh bëhet këtu nga mediat kundër qeverisë. Asnjë pakt nuk ka me ta. Le ta bëjnë si të duan punën në ekrane. Ne do bëjmë punën tonë. Nuk bëjmë pakte pas shpinës tuaj”, deklaroi Rama.
