Prokuroria e Posaçme (SPAK) kërkon 1 vit burg për kryebashkiakun e Mallakastrës Qerim Ismailaj, për fshehjen e dënimit me 3 vite burg në Greqi.
Një vit më parë, Ismailaj u kallëzua në prokurori nga PD për kryerjen e veprës penale “Falsifikimi i vulave, i stampave ose i formularëve”. Hetimet kanë konkluduar se Qerim Ismailaj nuk e kishte deklaruar në formularin e dekriminalizimit, një dënim në Greqi në vitin 1999 për plagosje.
Më herët, gjykata ka pranuar kërkesën e Ismailajt për gjykim të shkurtuar, i cili rezulton të jetë përfshirë në një sherr në shtetin fqinj teksa qëndrote si emigrant.
Sipas kallëzimit të dorëzuar në SPAK nga PD, rezulton se nga evidenca e shërbimit të oficerit të policisë P.F., të datës 30.01.1999 Qerim Ismailaj, ishte thirrur sipas ligjit dhe në kohë për t’u paraqitur në MOD të Chios (Greqi) gjatë ditës së gjykimit në 25.02.2000. Më tej, nga evidenca e shërbimit të datës 28.06.1999, e oficerit të policisë P.F., rezulton se i pandehuri mori dijeni për akuzën që atribuohej kundër tij, nëpërmjet materialit përcjellës me numër 58/1999, me të cilin ai u referua që gjykohej përpara Gjykatës së Përbërë nën Betim (MOD – Gjykata e Përbërë nën betim e Chios).
“Kjo provon që ai ka pasur dijeni për gjykimin dhe dënimin e tij në shtetin grek, por e ka fshehur këtë fakt në formularin e dekriminalizimit”, thotë PD në kallëzim, ndërkohë që Ismailaj ka deklaruar se nuk ka pasur dijeni për dënimin në shtetin grek.
Qerim Ismailaj është hetuar në gjendje të lirë.
