Këtë të mërkurë Dhoma e Tregtisë ka zhvilluar një konferencë për t’i treguar qeverisë pikëpyetjet dhe problemet që biznesi ka në raport me paketën fiskale që është hartuar për vitin 2023.
Në fjalën e tij kreu i Dhomës së Tregtisë, Nikolin Jaka ka shprehur rezerva, duke thënë se paketa e re fiskale është e pamjaftueshme dhe fokusohet në vendosjen e gjobave e penaliteteve, në një kohë kur kërkohen ndërhyrje radikale në ekonomi, pasi është goditur nga kriza.
Jaka prezantoi edhe disa propozime që sipas tij, do të jenë të dobishme në mënyrë të drejtpërdrejtë te çdo sektor, por theksin e vendosi te lehtësia fiskale për sipërmarrësit në mënyrë që ata të përballojnë krizën ekonomike dhe inflacionin në rritje.
“Kriza e çmimeve e ka vënë sipërmarrjen përballë sfidave të mëdha. Industritë prodhuese po përballem me kosto që shkojnë mbi 50 %. Dhoma e Tregtisë duke u njohur me paketën e re fiskale shprehet se ekonomia ka nevojë për ndërhyrje radikale. Paketa fiskale jo vetëm që nuk është e mjaftueshme është e fokusuar në shumëfishimin e penaliteteve e gjobave. Në asnjë shtet nuk aplikohen gjoba që janë 10-fish në dëm. Nga ana e qeverisë të ndërmerret një paketë e strukturuar duke u përqendruar tek industritë prodhuese dhe biznesi në tërësi. Të ketë ulje të ngarkesës fiskale”, tha Jaka.
Ai komentoi edhe projektligjin për Amnistinë Fiskale, duke thënë se nuk mund të miratohet pa u konsultuar me grupet e interesit. Sipas Jakës, “Dhoma e Tregtisë” ka 12 vite që bën propozime për këtë hap, por duhen parë problemet e sipërmarrjes private në mënyrë që ligji të mos e dekurajojë atë.
Dhoma e Tregtisë gjithashtu kërkon që drafti të parashikojë një mekanizëm që parandalon informalitetin, pasi përndryshe do të rezultojë në qokën e radhës të klasës politike.
“Dhamë disa sinjale të pastra. Dhoma e Tregtisë ka qenë këtu e 12 vjet prezent me një draft të amnistisë fiskale. Kemi shpenzuar kohë për të bërë një draft të parë mirë me precedencat e vendeve të tjera. Dhe megjithëse ne u fokusuam shumë te ky draft qeveria e mori dhe e përdori për interesat e saj pa e dialoguar me sipërmarrjen private. Kemi një draft që është lançuar më shumë me debate por nuk jemi ulur me grupet e interesit. Amnistia dekurajon sipërmarrjen e ndershme por nga ana tjetër çdo sipërmarrës i ndershëm përveç pasojave që ka pasur e pranon më mirë dhe më shpejt që të amnistohet kjo sipërmarrje dhe të futet në garën e ligjshmërisë. Që të mos dekurajojmë sipërmarrjen private duhet që institucionet përgjegjëse për implementin e amnistisë fiskale të jenë evidente dhe të parashikuar në projektligj. Nuk ka asnjë nen që parandalon informalitetin. Duhet të shikojmë kush janë problemet e sipërmarrjes private. Duhet që instrumentet që pas daljes së kësaj amnistie fiskale. Ndryshe kjo amnisti do bëjë qokën e radhës kjo klasë politike ka 32 vjet që e bën”, deklaroi ai.
Ndërkohë, sipërmarrësi Stefan Pinguli ka kritikuar qeverinë për ndryshimet në projektligjin e akcizës që unifikojnë nivelin e tarifës për prodhuesit e vegjël me prodhuesit e mëdhenj të birrës dhe të pijeve të forta alkoolike.
Sipas tij ndryshimet do të ndikojnë duke rritur kostot prodhuese, deri në rrezikimin e falimentimit.
“Në Shqipëri ka 53 % të sasisë së birrës të importit mendoi sikur të barazohen këto , ku do të shkojnë të gjithë këto. Kur qeveria rrit dyfishin e taksave në lidhje me prodhimin vendas, atëherë shkojnë në falimentim. Pra, kjo ndodh kur të gjithë kemi marrë masa financiare e borxhe që të mbajnë bizneset, kjo është situata”, tha Pinguli.
