Kryeministri Edi Rama i vendosi sot “kapak” problemit që i është hapur me Sindikatën e Pedagogëve, të cilët kanë dalë në protestë, duke i lajmëruar se nuk do të ketë më rritje rroge, përveç asaj 7% që u vendos një javë më parë.
“Koha kur qeveria rrit pagat në mënyrë uniforme sepse kërkojnë sindikatat ka mbaruar bashkë me reformën e Arsimit të Lartë. Autonomia është liri dhe përgjegjësi. Kjo është hera e fundit që ne bëjmë rritje page uniforme”, tha Rama në takimin me rektorët e universiteteve.
Por në një kohë që qeveria pretendon se nuk ka mjaftueshëm para për të financuar Arsimin Universitar dhe nuk mund të sforcohet për pedagogët, ministrja e Arsimit Evis Kushi në Komisionin e Arsimit lajmëroi një rritje tjetër të pagave për mësuesit e shkollave 9-vjeçare dhe gjimnazeve.
Sipas Kushit mësuesit meritojnë më shumë edhe pas rritjes 32% gjatë mandatit të fundit, duke parashikuar që në përfundim të këtij mandati rritja të shkojë në 40%.
“Mësuesit meritojnë më shumë, i rritëm pagat mandatin e kaluar pavarësisht tërmetit e pandemisë. Janë rritur 32%. Mandatin e ri jemi angazhuar për 40% rritje, vitin e ardhshëm do të ketë sërish rritje, deri në fund të mandatit minimumi i rritjes do jetë 40%. E përsëris, mësuesit meritojnë më shumë. Për të vlerësuar cilësinë në arsim duhet të bëjmë ende vëzhgime, megjithëse ka shumë për të përmirësuar. Kurrikula jonë është e përshtatur, kur shkojnë jashtë nxënësit tanë dalin shumë mirë”, deklaroi ajo.
