Ashtu siç ishte paralajmëruar, dy të përzgjedhurit nga grupi i Enkelejd Alibeaj dhe ai i Sali Berishës për të negociuar një marrëveshje të mundshme për daljen me kandidatë të përbashkët të Partisë Demokratike në zgjedhjet lokale janë takuar sot në një lokal në kryeqytet.
Gazmend Bardhi dhe Edi Paloka janë ulur në një bar-kafe përballë godinës së Parlamentit reth orës 11:10, ndërsa i vetmi që është prononcuar për mediat pasi është surprizuar nga prania e tyre në momentin që ka zbritur nga makina ishte Kryetari i Këshillit Kombëtar të PD-së.
“Sikur të gjëmonit edhe tenderat e qeverisë kaq sa në ndiqni ne…Bravo iu qoftë”, i tha Paloka, gazetarëve.
E teksa detaje nuk kanë rrjedhur për diskutimet gjatë takimit “kokë më kokë” të dy negociatorëve, vlen të theksohet se arritja e një pakti mes palëve është ende e diskutueshme.
Optimizmi më i lartë është në radhët e deputetëve të drejtuar nga Sali Berisha, me vetë ish-kryeministrin që nuk e fshehu ditën e djeshme në mbledhjen me drejtuesit politik të qarqeve besimin për bashkimin e PD.
Teksa Berisha lajmëroi nisjen e procesit të primareve, në krahun tjetër Enkelejd Alibeaj u takua me deputetët e tjerë në Kuvendin e Shqipërisë, ku i mandatuari Gazmend Bardhi tregoi se ka pasur komunikim me Palokën, por shprehu skepticizëm për një marrëveshje.
“Disa ditë më parë unë pranova të jem personi që do të kontaktoj me z. Paloka i cili është mandatuar nga grupi tjetër i kolegëve të PD. Dua t’ju sqaroj se kam qenë në komunikim me z.Paloka por nuk jemi takuar për shkak se ai ka qenë jashtë shtetit. Kemi dakordësuar që të takohemi të martën. Fatkeqësisht paralelisht me këtë takim të parashikuar me z. Paloka nga media jam njohur me një mbledhje që do të zhvillohet në PD për nisjen e procesit të primareve. Kjo na bën të jemi përpara një fakti të kryer. Por unë do t’i qëndroj deri në fund vullnetit të shumicës për të kryer çdo diskutim në funksion të daljes me kandidat të përbashkët në zgjedhjet vendore”, mësohet se iu tha Bardhi, deputetëve ditën e djeshme.
Ndërkohë në një intervistë gjatë mbrëmjes në një emision televiziv, Bardhi gjithashtu theksoi rëndësinë e bisedimeve pa kushte dhe vlerësoi faktin që edhe Sali Berisha është shprehur kundër vendosjes së palës tjetër përballë një fakti të kryer.
“E kam thënë më parë, edhe zoti Berisha e tha, që ne hyjmë në këto negociata pa kushte. Nëse do të vendosim kushte dhe do të qëndrojmë peng i konflikteve apo debateve, mendimeve të ndryshme që kemi patur gjatë këtij viti, e sigurt është që nuk do të gjejmë dot një rrugë që na bashkon, një rrugë që na siguron bashkëpunim të sinqertë të demokratëve në njësitë vendore për të qenë konkurrues dhe për të fituar zgjedhjet. Zoti Berisha nuk ka vendosur kushte, nuk ka pranuar kushte, mesa ka pohuar publikisht. E njëjtë ka qenë edhe qasja jonë, nuk vendosim dhe nuk pranojmë kushte”, deklaroi Bardhi.
Ndërkohë, takimi ka zgjatur më shumë se 1 orë, me Bardhin dhe Palokën që kanë dalë jo shumë larg në kohë nga njëri-tjetri prej lokalit ku ishin ulur.
Deputeti Gazmend Bardhi, i cili u largua i pari foli shumë pak për gazetarët duke thënë se “po vijojnë diskutimet”.
Edhe Edi Paloka iu përgjigj interesit të shfaqur nga mediat, duke thënë: “Nuk ka dështuar, është vullneti i përbashkët për të dalë me një kandidat”.
