Nga Boldnews.al
Dy breshka toke qëndrojnë gjithnjë në zyrën ku shkon Rama, në kryeministri apo PS. Gjithë ditën hanë, levizin vërdall dhe jashtëqisin ku të duan, për t’i dhënë frymë më të pastër dhe luftuar me sa të munden asmën e shefit të tyre. Por bota nuk është më si më parë, as shefi nuk është më ai i pari që nga puna e madhe propagandistike ka lodhje të dukshme. Dimri është edhe më i vështirë.
Gjethi ka rënë përdhe. Koncerte nuk zhvillohen dot në ambiente të hapura. Brigjet e liqenit në Tiranë nuk mbushen me njërëz të “gëzuar” që shëllehen në diell me barkun bosh dhe thurin lavde për qeverisjen.
Putini e ka fajin për luftën, inflacionin që po na vret çdo ditë (çmimet e rritura) dhe krizën energjitike, padyshim edhe opozita është fajtore që për dhjetë vite që është në opozitë ka “qeverisur keq”. Këtë fabul deri më tani e kanë kapërdirë shumë qytetarë, por Ramës do i duhet të rishpikë edhe armiq të tjerë, të brendshëm, të jashtëm, madje edhe “armiq” të padukshëm që nuk na sjellin shi të dendur për të mbushur hidrocentralet.
“Mirëmëngjes, mirëmëngjes, qenke zgjuar eee. Një ditë e re, një javë e re. Në zyrën e Partisë Socialiste për të nisur edhe një rrugë të re drejt një fitoreje të re, atë të zgjedhjve vendore në dialog me komunitetet në të gjithë Shqipërinë për qeverisjen vendore dhe sfidat e përbashkëta. Paçi një javë të mbarë me sa më shumë shi mundësisht. Shiu nuk duhet të na harrojë sepse na duhet për të luftuar inflacionin e luftës sës Putinit që nuk e kemi sjellë ne por duhet të bëjmë çmos që ta lehtësojmë për të gjithë ju. Një javë sa më të mbarë”, shprehet Rama në një video të filmuar nga vetë ai, duke biseduar me dy breshkat e tij.
Të dyja breshkat janë frymorët më të rëndësishëm dhe gjenden një hap lart fatit të kalit të Kaligulës që u emërua Senator (i ngjashëm me deputetët e listave të kryetarit)… Por ka një problem që Ramën e shqetëson shumë. Në muajt nëntor-prill breshkat kalojnë në gjumë letargjik, për të shkuar në periudhën aktive prill-nëntor.
Megjithatë për të kuptuar mënyrën e qeverisjes së Ramës forma më e mirë është të dekriptohet “dialogu” i sinqertë me dy breshkat e tij. Pikërisht ditën e sotme që duhet të niste mësimi në universitetet e vendit Rama nuk uron studentët, por breshkat e tokës. Sfidon grevën e pedagogëve që kërkojnë rritje pagash dhe njëkohësisht kërcënon se ditë të zeza do të vijnë, por ai “zemërbardhë” si gjithnjë është shpëtimtari i vetëm, duke akuzuar si fillim armikun e jashtëm Putinin për luftën në Ukrainë dhe më pas edhe Perëndinë që nuk po sjell shiun e nevojshëm për të mbushur hidrocentralet për energji elektrike.
Të dyja justifikimet e dështimeve janë të qarta. I gjithë dimri do të kalohet me fabulën e armiqve të brendshëm dhe të jashtëm, por edhe të tekave të natyrës. Ka një favor kreu i qeverisë. Breshkat e tokës janë në kulmin e pjekjes seksuale që nis me moshën mbi nëntë vjeç. Fiks aq sa është në krye të qeverisë. Ky është një lajm i mirë për Rilindjen që të tjera breshka do lindin në stanin e propagandës!
