Në operacionin antidrogë të policisë turke në Stamboll përveç efektivit të policisë Rrugore, Florenc Bicerri, në pranga ra edhe ish-komando i Forcave të Armatosura, Kujtim Çeliku.
Dyshja në fjalë ka udhëtuar në drejtim të Turqisë nga Rinasi më 5 tetor, ndërkohë që në pranga kanë rënë për shkak të përfshirjes në organizatë kriminale që ka trafikuar një sasi të konsiderueshme droge.
Ndërkohë, Kujtim Çeliku, nga fshati Mullet i Tiranës nuk është i panjohur për policinë shqiptare, pasi ai ka qenë i arrestuar më 17 shtator të 2011-ës.
Në atë kohë, Çeliku ushtronte detyrën si oficer i ushtrisë, në repartin e forcave speciale “Komando”, ndërsa u arrestua me akuzën e grabitjes.
Oficeri që kishte kryer 5 misione paqeruajtëse në Irak e Afganistan, përfundoi në pranga, pasi kërkohej për grabitjen e një çante me 176 unaza floriri, me një vlerë prej 30 milionë lekëshe ndodhur në maj 2011, në banesën e një biznesmeni në Durrës.
Gjatë kontrollit në banesën e Çelikut në Mullet, u gjetën edhe municione dhe kallëpe tritoli, që ai i mbante pa leje.
Asokohe, Çeliku po përgatitej për një tjetër mision paqeruajtës që do të niste pas dy javësh në Irak, ku ai kishte shërbyer më parë 3 herë. Emri i tij figuronte në listën me 58 komando paqeruajtës, të cilët janë dekoruar në vitin 2003 me medaljen “Për Shërbime Ushtarake”, dhënë nga Presidenti i Republikës.
