Kryeministri Edi Rama ka vijuar akuzat ndaj opozitës pas kritikave për fjalimin në Këshillin e Europës. Sipas Ramës, shumica në delegacionin shqiptar në KiE votoi pro një raporti të Dick Marty në 2011 ndërsa opozita e kohës kundër.
“Kujtesa historike na e thotë sot me fakte të shkruara, se kur rezoluta e iniciuar nga përfaqësuesit e partisë së Vladimir Putinit dhe e mbështetur më tej nga raporti famëkeq i Dick Marty-t mbi trafikun e organeve njerëzore, u paraqit për votim në Asamblenë e Përgjithshme, ajo fatkeqësisht mori votën pro të përfaqësuesit të Partisë Demokratike në delegacionin shqiptar, ndërsa u kundërshtua nga dy përfaqësuesit e tjerë nga Shqipëria, Damian Gjiknuri e Shpëtim Idrizi” – shkruan Rama.
Ai ka publikuar edhe fjalët e Damian Gjiknurit të 2011-ës në Asamblenë e Këshillit të Europës.
“Ky raport ka tërhequr vëmendjen e shumë njerëzve, për shkak të seriozitetit të akuzës, natyrës së krimeve të pretenduara dhe MUNGESËS SË PROVAVE” – thoshte ndër të tjera Gjiknuri në atë kohë.
Për këtë çështje ka folur shpesh edhe kryetari i PD-së, Sali Berisha. Ai tha se vota e delegacionit shqiptar ishte vetëm për hapjen e hetimeve dhe jo për raportin.
“Nuk është e vërtetë është se është votuar raporti i Dick Martyt në Këshillin e Europës. Është votuar rezoluta në të cilën nuk ka asnjë fjalë as për krime. Ka kërkesën që hetimi i të dhënave të raportit të Dick Marty-t të bëhet në Shqipëri e Kosovë. Po të mos ishte votuar, Shqipëria pranonte fajësinë” – është shprehur Berisha./Lapsi.al
