Partia e Lirisë ka reaguar pas vendimit të Prokurorisë për të mos filluar hetimet për çështjen penale për kallëzimin e Metës ndaj Autoritetit të Dosjeve.
Gjatë një deklarate për mediat, Petrit Vasili renditi edhe shkeljet që janë bërë nga ana e Prokurorisë, që sipas tij shkeljet janë bërë si në procedurë është edhe në përmbajtje.
“Prokuroria e Tiranës ka vendosur mos fillimin e çështjes penale për kallëzimin e bërë nga Meta ndaj anëtarëve të autoritetit të dosjeve. Ky vendim shkel ligjin si në procedurë është edhe në përmbajtje.
Së pari, veprimet e Prokurorisë kanë qenë skandaloze dhe të paimagjinueshme. Prokuroria nuk ka dëgjuar farë palën akuzuese, por vetëm të akuzuarve. Së dyti, Prokuroria duke mos regjistruar procedimin penal nuk i ka marrë dokumentet që tregonin qartë shpërdorimin e detyrës së autoriteteve të dosjeve. Së treti është fakt publik që vetë drejtuesja, Genta Sula ka pohuar se dy anëtarë të autoritetit kanë bërë verifikimet. Po kjo drejtuese, në dëshminë e dhënë në prokurori ka dëshmuar të kundërtën, duke thënë se nuk është kryer ndonjë verifikim.
Pra dëshmi kontradiktore. Së katërti, është një shkelje shumë e rëndë penale, që pa bërë verifikim për identitetin e Metës, autoriteti ka caktuar emrin e Ilir Metës gjoja të lidhur me sigurimin e shtetit pa pasur asnjë dokument. Së pesti megjithëse ligji nuk e lejonte është bërë verifikimi me Metën dhe konkluzionet gjoja të nxjerra janë përcjellë nga autoriteti i dosjeve kuvendit një ditë pas themelimit të PL. Së gjashti është fakt që në shkelje të ligjit, përfaqësuesit ligjor të zotit Meta nuk i janë vënë në dispozicion as dokumentet nga autoriteti i Dosjeve. Ky vendim i prokurorisë është nul”, tha Vasili.
Prokuroria e Tiranës ka vendosur që të mos fillojë një procedim penal ndaj anëtarëve të Autoritetit të Dosjeve, pas kallëzimit të bërë më 1 shtator nga kryetari i Partisë së Lirisë, Ilir Meta.
Prokuroria sqaroi se nisur nga kallëzimi i Metës, por edhe bazën ligjore mbi të cilën ka operuar Autoriteti i Dosjeve, nuk ekzistojnë rrethanat e mjaftueshme për regjistrimin e procedimit penal, që lidhet me ekzistencën e figurës apo figurave të veprës apo veprave penale.
Avokati Genc Gjokutaj ka dhënë detaje mbi shkelje të ligjit të bëra nga ana e Autoritetit të Dosjeve dhe prokurorisë. Ai tha se Meta nuk ishte thirrur në prokurori për të deklaruar sa i takon padisë së bërë ndaj Autoritetit të Dosjeve.
“Prokurori e ka paragjykuar çështjen për të mos thënë se është i urdhëruar për të marrë vendime tëtilla, pasi Meta që është kallëzues nuk është thirru për të dhënë deklaratën e tij.
Halli më i madh sot është se hetuesi nuk heton, nuk dëshiron ta bëjë këtë. Thirrja e Metës ishte një domosdoshmëri për të shpjeguar arsyen e kallëzimit dhe dokumenteve që ai zotëron. Në fazën verifikuese është e domosdoshme të dëgjohen palët. Por nuk mjafton vetëm pyetja e palëve, që do çonte në sekuestrimin e dokumentacionit, gjë që do të çonte deri në fund dhe do të zbardhte shkeljet e bëra nga Autoriteti i Dosjeve.
Kjo procedurë ka nisur me një email anonim, ka vijuar me shkresë të dërguar ndaj kuvendit që është një shkelje. Autoriteti është në hall për këtë çështje, por mjafton një hetim nga prokuroria për ta zgjidhur.”- tha Gjokutaj.
