Dyert e SPAK-ut u hapën pasditen e sotme për një nga njerëzit më të afërt dhe më të besuar të kryeministrit Edi Rama që nga vitit 2013 kur erdhi në pushtet, Sekretarin e Përgjithshëm të Këshillit të Ministrave, Engjëll Agaçi.
Agaçi qëndroi përreth një orë në zyrat e SPAK dhe doli më pas duke kaluar para gazetarëve me një dosje të zezë në dorë.
Personazhi që akuzohet nga opozita dhe kreu i PD, Sali Berisha si ai që luan “fijet” në Kryeministri dhe mbi të cilin rëndon edhe pesha e aferës së inceneratorëve për vjedhjen me firmë qeverie të mbi 400 milionë eurove, u paraqit para prokurorit Dritan Prençi.
Kujtojmë se Prençi heton aferën e inceneratorëve për llogari të Prokurorisë së Posaçme dhe rrjedhimisht, edhe pse vetë Agaçi nuk komentoi arsyen për të cilën ishte thirrur, ai dyshohet të jetë pyetur lidhur me këtë çështje.
Ndërkohë, sipas News24 ai është pyetur specifikisht për inceneratorin e Tiranës.
Kujtojmë se Agaçi u paraqit edhe në Komisionin Hetimor për Inceneratorët më 22 shkurt të këtij viti, ku u përplas me deputetët e opozitës, të cilët e akuzojnë se ka firmosur të gjithë procedurat ligjore brenda 24 orëve në shkelje flagrante të ligjit.
Asokohe, deputetët e opozitës kërkuan shpjegime në lidhje me vendimin e qeverisë për dhënien e lejes te koncesionari për ndërtimin e inceneratorit të mbetjeve në një ditë kur është hapur oferta dhe firmosjen e 17 vendime brenda një dite.
Ndërkohë, për të njëjtën dosje ndodhet aktualisht në burg ish-ministri i Mjedisit Lefter Koka dhe në arrest shtëpie ish-deputeti i PS Alqi Bllako, ndërsa gjasat janë që SPAK po përfundon hetimet.
