Vladimir Putin ka zhvendosur një numër të madh avionësh bombardues bërthamorë të Rusisë në bazën ajrore pranë kufijve të Finlandës dhe Norvegjisë, edhe pse ditën e sotme u shfaq i tërhequr nga ideja për të goditur vendet anëtare të NATO-s me armë bërthamore, pasi sipas tij do të shkatërrohej bota mbarë duke u futur në kaos.
Sipas pamjeve satelitore, tirani rus ka rritur gradualisht numrin e bombarduesve strategjikë në bazën ajrore “Olenya” – nga 0 që kishte më 12 gusht, në katër Tu-160 supersonikë më 21 gusht, dhe i ka shtuar më pas në 11, në tetor.
Janë shtatë bombardues strategjikë Tu-160 të shënuar me të kuqe në imazhet satelitore të publikuara rishtazi dhe katër avionë Tu-95 të shënuar me të verdhë në objektin në Gadishullin Kola, që ndodhet në ekstremin veriperëndimor të Rusisë.
Zbulimi vjen nga Faktisk.no, një faqe interneti e pavarur norvegjeze për kontrollin e fakteve, e cila mori të dhënat nga operatori satelitor amerikan “Planet”.
Shtimi i forcave në bazën ajrore pason shqetësimin ndërkombëtar për një raport tjetër dy javë më parë, kur The Jerusalem Post zbuloi se kishte një ‘vendosje të pazakontë’ të shtatë bombarduesve bërthamorë në bazën ajrore.
Kjo u theksua nga firma izraelite e inteligjencës ImageSat International e cila zbuloi ‘praninë e parregullt’ të TU-160 dhe TU-95.
Avionët Armageddon zakonisht janë të stacionuar në bazën ajrore Engels, 450 milje në jug-lindje të Moskës.
Tani, megjithatë, bombarduesit janë të stacionuar rreth 115 milje larg kufirit të Norvegjisë anëtare të NATO-s dhe rreth 95 milje larg nga Finlanda, anëtarja që pritet t’i shtohet Aleancës së shpejti.
Gjithashtu ka prova që në Olanya ka edhe raketa lundrimi Kh-101 për përdorim të mundshëm kundër objektivave në Ukrainë. Kh-101 mund të mbajë koka luftarake konvencionale ose bërthamore.
