Humbja ndaj Makabi Haifës nuk mund të kalonte pa lënë shenjë te Juventusi. Klubi bardhezi e di se është momenti për të ndryshuar drejtimin e sezonit të tyre dhe mbi të gjitha është momenti për të marrë përgjegjësi.
Për këtë, pas humbjes në Champions League dhe me derbin ndaj Torinos në horizont, drejtuesit juventinë kanë vendosur që skuadra t’i nënshtrohet një grumbullimi që do të zgjasë të paktën deri të shtunën kur do të zbresin në fushë ndaj rivalëve të qytetit. Grumbullimi ka nisur dje me rikthimin nga Izraeli dhe lojtarët nuk janë lejuar t’u drejtohen shtëpive të tyre, por nga aeroporti janë drejtuar të gjithë në qendrën stërvitore në Kontinasa, ku “Zonja” do të përpiqet të rikthehet kompakte dhe të bëjë përgatitjet e duhura si për derbin ashtu edhe për ndeshjet në vazhdim. Një mënyrë për të rigjetur frymën e grupit kjo e Alegrit, që ka pohuar se do të jetë një sfidë për të, të rikthejë Juven te fitoret pas vështirësive, një nga motivet për të cilat sipas tij nuk ka në plan të japë dorëheqjen.
E në fakt grumbullimi disaditor, i pashkëputur në “J Hotel”, është një taktikë që trajneri bardhezi e ka provuar edhe më parë, së cilës i ka korrur edhe dy herë të tjera frytet. Në 2015, në aventurën e tij të parë si trajner i bardhezinjve, “Konti Maks” e mori këtë vendim thuajse në të njëjtën periudhë të vitit, në fund të tetorit dhe kjo lëvizje e tij shërbeu si pikënisja e serisë pozitive të rezultateve që sollën më pas titullin. Grumbullimi pati impakt pozitiv edhe një sezon më parë, kur u aplikua pas humbjes ndaj Veronës dhe më pas solli reagimin në Champions Legaue ndaj Zenitit e më pas ndaj Fiorentinës në kampionat. Kjo do të jetë hera e tretë që Alegri zgjedh këtë metodë për të rregulluar gjërat te Juventusi, por këtë herë edhe vetë trajneri e di se ajri është më i rëndë, arsye për të cilën nuk përjashtohet që kjo shkëputje e skuadrës nga çdo gjë tjetër të zgjasë përtej së shtunës.
