Nga Boldnews.al
Para pak muajsh, BoldNews.al denoncoi disa tendera të dyshimtë që po kryente Korporata Elektroenergjitike Shqiptare për ngritjen e një sistemi satelitor që do të parashikonte motin. Për këtë sistem, me dy procedura të ndryshme, KESH shpenzoi plot 2.5 milionë euro. Në atë kohë, drejtori i Korporatës, Ergys Verdho, “sfidoi” Ramën, pasi “ngriti” i pari satelitët.
Por, a mjaftoi ky fond për të parashikuar motin apo prurjet në kaskadat e hidrocentraleve?!
Natyrisht, Verdho është mësuar të shpenzojë pa kufi para publike, pasi edhe gjatë kohës që drejtonte Autoritetin Rrugor Shqiptar kishte “dorë të lirë”. Ai njihet si një nga drejtorët besnikë të ministers Balluku, ku të dy, në kulmin e krizës energjitike, kanë bërë me dhjetëra procedura të dyshimta, duke shpenzuar qindra miliona euro.
Por, si është gjendja?
Në dokumentet e tenderëve për parashikimin e motit, KESH shkruante se një gjë e tillë po kryhej për të matur sasinë e ujit që do të shkojnë në hidrocentrale. Ndërkohë, i njëjti institucion, po zhvillon një tjetër tender, kësaj herë “për të llogaritur nivelin e ujit në hidrocentrale”.
Një paradoks i madh me paratë publike, pasi për të njëjtin shërbim, bëhen disa tendera. Madje, për të njëjtin shërbim, KESH ka të punësuar dhjetëra punonjës që paguhen me taksat e shqiptarëve.
Por, nëse ka gjithë këto para’ që qarkullojnë për energjinë, përse nuk kompenzohen familjet në nevojë?
Pensionistët apo ata me probleme shëndetësore?
Vendet fqinje, Kosova, Maqedonia e Veriut, Mali i Zi, për të mos kaluar te Greqia apo Italia, kanë miratuar paketa ndihme për këto familje. Ndërkohë, vendi ynë bën pambarimisht tendera të pakuptimtë, sicc ishin edhe anijet e ndryshkura që do të prodhojnë energji, të ankoruara prej muajsh në Vlorë.
Sipas dokumenteve që disponon BoldNews.al, Korporata Elektroenergjitike Shqiptare ka hapur procedurën e prokurimit “batimetria e liqeneve të Fierzës, Komanit dhe Vaut të Dejës, përllogaritja e volumit të ujit, krahasimi me volumin sipas projektit dhe me matjen e fundit”. Një nga pikat e tenderit është përllogaritja e volumit të ujit apo krahasimi me matjen e fundit, një shërbim i cili kryhet aktualisht nga punonjës të KESH-it.
Po përse kërkohet një privat për këtë shërbim?
Nuk janë të aftë punonjësit shtetërore?!
Apo edhe këto Hidrocentrale do t’ia kalojnë privatit?
Natyrisht, pas këtij tenderi, mund të ngrihen shumë pyetje. Por, fakti është se për matjen e nivelit të ujit do të shpenzohet një shumë prej 170.000.000 lekë, ose me TVSH rreth 1.7 milionë euro. Një shumë e konsiderueshme, e cila duket se do të jetë “qoka” e radhës në këtë kohë krize. Por nëse ka kaq shumë para’ për energjinë, do të thotë se nuk jemi në krizë?!
