Pritjes duket se i ka ardhur fundi. Pas 3 mujash të mbushur me thirrje dhe paralajmërime, Partia Demokratike dhe kryetari i saj Sali Berisha do të intensifikojnë sot aksionin opozitar për t’i kërkuar llogari mbi keqqeverisjen dhe abuzimet me paratë e shqiptarëve, kryeministrit Edi Rama.
Teksa kreu i selisë blu kishte sqaruar në daljet e tij se aksioni i opozitës do të jetë në disa drejtime, ku do të përfshihen protesta dhe greva, Berisha ka zgjedhur Elbasanin për të nisur “revoltën”.
“Ju ftoj të angazhohemi në këtë betejë dhe të angazhohemi për protesta të fuqishme. Nuk mund të pengojnë përpjekjet për zgjedhjet lokale. Do bëjmë gjithçka për të dalë me një kandidat. Kjo nuk mund të na pengojë pa ndërmarrë protestat më të fuqishme. Sepse përndryshe do të kemi vetëm rrënim. Dy javë më parë, deklaroi rritjen e energjisë elektrike. Sot, e vendosi sërish për muajin nëntor. Mirë e bën nëse ne e lejojmë. Ai tallet me shqiptarët. I shumëzon me zero. Koha është t’i japim përgjigjen e merituar dhe unë kam besim të madh te qytetarët se në betejën e ardhshme Edi Rama do të marrë atë që meriton”, deklaroi Berisha pak ditë më parë.
Pikërisht në qarkun më qendror të Shqipërisë do të nisë vala e re e tubimeve, pasi PD ka njoftuar sot protestë në qendër të qytetit kundër rritjes abuzive të çmimit të naftës.
“Partia Demokratike, dega Elbasan, do të nisë nga kjo e martë protestat kundër qeverisë. Pas rritjes abuzive të çmimit të karburanteve nga Bordi i Transparencës, PD-ja, dega Elbasan, do të organizojë një protestë për 60 minuta ditën e martë 11/10/2022, në ora 11:00, në sheshin ‘Gensher’ në qendër të Elbasanit”, thuhet në njoftimin e PD-së.
