Kryetari i Partisë së Lirisë, Ilir Meta i ka bërë thirrje sërish mazhorancës që të tërhiqet nga përpjekja për të miratuar ligjin për amnistinë fiskale.
Gjatë një deklarate për mediat, Meta theksoi se ky ligj synon të fusë në sistemin bankar dhe të ligjërojë qindra miliona euro evazion që është bërë nga kompani me bekimin dhe në shërbim të qeverisë.
“Ne nuk kemi ende një administratë tatimore dhe me mjetet e duhura të kontrollit dhe zbatimit të ligjit dhe njëkohësisht duhet një kornizë efektive në luftën kundër pastrimit të parave dhe luftën kundër terrorizmit. Kjo iniciativë e kryeministrit aktual do të favorizonte qartësisht botën e krimit, duke i ofruar mundësi që të ardhurat e përfituara nga krimi të pushtojnë ekonominë vendase. Do të goditej biznesi i ndershëm dhe do dekurajoheshin investimet e huaja në Shqipëri. Do të minojë besimin e shoqërisë te shteti i së drejtës dhe do të nxitej edhe më shumë ekonomia informale. Do minoheshin përpjekjet për të luftuar krimin e organizuar, i cili sipas raporteve e ka kthyer Shqipërinë në një baza operacionale. Sikurse ka përsëritur BE do dëmtohej procesi i bashkëpunimit me vendet partnere dhe vetë procesi i integrimit në BE. Janë provuar 180 milionë euro evazion fiskal. Kjo përpjekje synon të pastrojë këto vepra penale një herë e përgjithmonë”, tha Meta.
Në një kohë që kryeministri Edi Rama ka dalë me “shpatë” në dorë për të sulmuar BE dhe SHBA për qëndrimin e tyre ndaj nismës që do t’i hapte rrugën legalizimit të “parave të pista” në ekonominë shqiptare, përfaqësuesja e FMN-së Yan Sun ia tha në sy Ibrahimajt se Amnistia dëmton rëndë moralin tatimor në vend.
Ajo shtoi më tej se aplikimi i këtij projektligji të propozuar nga qeveria shqiptare është një “biletë” për eksponentë të krimit që t’i shmangen kontrollit të ligjit dhe ndjekjes penale për pasurinë e tyre të ndërtuar në rrethana të errëta.
Gjithashtu pjesa më e madhe e vendeve të BE-së kanë kritikuar qeverinë Rama dhe nismën e mazhorancës për të miratuar amnistinë fiskale pasi sipas tyre minon ekonominë e Shqipërisë.
