“Lufta” në distancë midis Shqipërisë dhe Republikës Islamike të Iranit është intensifikuar së fundmi, me Teheranin që akuzohet se ka angazhuar hakerat për të sulmuar sistemet e të dhënave si e-Albania, TIMS dhe MEMEX.
Por, ditën e djeshme grupi i hakerave “HomelandJustice” që ka drejtuar operacionin për vjedhjen e të dhënave nga shteti shqiptar dhe publikimin e tyre online, njoftuan se kanë shtënë në dorë edhe sistemin “Deep Sea” të Policisë së Shtetit, i cili fsheh materiale tepër sensitive.
Lidhur me kërcënimin për publikimin e tyre kundrejt pagesës, ka folur edhe gazetari i kronikës Artan Hoxha, i cili thotë se “persona të botës së krimit pyesin çdo ditë për të dhënat e dala”.
Sipas Hoxhës, hakerat iranianë kanë marrë çdo server shqiptar për 14 muaj dhe se i kanë boshatisur ato të dhëna, por më e rënda është se nga sulmi është prekur edhe sistemi bankar i Shqipërisë, i cili po sulmohet dalë-ngadalë çdo ditë.
“Jemi ndodhur të pambrojtur krahas këtij sulmi. Ata kanë dëshmuar se janë future thellë në themelet e sistemeve tona, kanë punuar për 14 muaj për sulmin ndaj nesh. Lufta mes Iranit dhe Muxhahedienëve, viktima jemi ne. Shqipëria është gjetur e pambrojtur, askush nuk na thotë saktësisht se çfarë ka ndodhur. Na kanë marrë çdo server për 14 muaj, jo vetëm që kanë hyrë por i kanë boshatisur ato të dhëna. Na kanë marrë hipotekat, Aluzinin, dhe serverin e sistemit bankar. Ata po sulmojnë pak nga pak. Persona të botës së krimit pyesin çdo ditë për të dhënat e dala”, tha Artan Hoxha.
