Ashtu siç ishte paralajmëruar Presidenti i Republikës, Bajram Begaj mblodhi sot Këshillin e Sigurisë Kombëtare.
Në mbledhjen që zgjati për rreth dy orë është diskutuar për çështjen e sulmeve kibernetike iraniane, teksa në Kongresin e SHBA ka kaluar për shqyrtim një rezolutë e përgatitur posaçërisht për të dënuar sulmet e Republikës Islamike mbi Shqipërinë.
Në mbledhje kanë qenë të pranishëm kryeministri Edi Rama, prokurori i përgjithshëm Olsjan Çela, drejtori i përgjithshmit i policisë Muhamet Rrumbullaku, kryetari i komisionit të sigurisë Nasip Naço, zv. ministri i brendshëm Besfort Ramallari, shefi i shtabit të përgjithshëm i FA Arben Kingji, si dhe zv/drejtori i SHISH, Olian Kanushi.
Kujtojmë se hakerat iranianë kanë sulmuar prej 3 muajsh sistemet kryesore të të dhënave të shtetit shqiptar, duke nisur me e-Albania e vijuar më pas me goditjen e Policisë së Shtetit, ku ekspertët e AKSH dështuan të ruanin materialet sensitive të “TIMS” dhe “MEMEX”.
Sulmi kibernetik detyroi qeverinë shqiptare që të kundërpërgjigjej duke dëbuar nga vendi të gjithë stafin e ambasadës së Republikës së Iranit në Tiranë.