Grupimi i hakerave iranianë “Homeland Justice” ka vijuar me publikimin e të dhënave që janë hakeruar nga sistemet e Policisë së Shtetit, duke zbuluar të dhëna për agjentë dhe efektivë.
Në llogarinë e tyre në Telegram janë publikuar 4 lista me 300 emra, foto dhe të dhëna personale të personave që sipas ligjit shqiptar duhet të jenë sekret, por tashmë janë të aksesueshme për publikun.
“Ndoshta personat në këto lista janë shënjestrat e radhës”, është titulli që shoqëron këto materiale.
Më sipër hakerat kanë zbuluar një material konfidencial të Republikës Islamike të Iranit, ku thuhet se anëtarët e MEK të vendosur tashmë në Manzë të Durrësit, kanë ekzekutuar 6 këshilltarë amerikanë për të përmbushur qëllimet e tyre.
Ndërkohë në listën me emra të funksionarëve të Policisë së Shtetit shfaqet edhe Gledis Nano, ish-drejtori që u shkarkuar rreth një muaj më parë nga dyshja Bledi Çuçi dhe Edi Rama.
Emri i Nanos përbën një arsye më të fortë për t’i marrë për bazë kërcënimet nga Irani, pasi që nga 17 shkurti i 2016 ai ishte në krye të Drejtorisë së Antiterrorit në Policinë e Shtetit.
Nano mori pjesë edhe në operacionin e koordinuar me SHBA-të për lirimin e nënave dhe fëmijëve shqiptarë të mbetur në kampin “Al Hol” në Siri, ndërkohë që ka kryer hetimet për dosjen e “Imamëve” të arrestuar për terrorizëm në vitin 2013.
Ish-drejtori i policisë gjithashtu kishte në dorë të gjithë operacionin sekret të dëbimit një muaj më parë të diplomatëve iranian nga Shqipëria.
