Marsel Buçit i është shkrumbuar automjeti gjatë mesnatës në Bilisht. Ai është punonjës i karburantit që u akuzua më herët nga 27-vjeçarja Deizi Arapi, si autori i djegies së mjetit të saj më 25 shtator të këtij viti.
Burime pranë policisë bëjnë me dije se rreth 15 persona janë shoqëruar në komisariatin e Devollit, për t’u marrë deklarimet lidhur me djegien e mjetit të Marsel Buçit.
Sipas informacioneve, mes të shoqëruarve është edhe Deizi Arapi, ndërsa shtetasit e tjerë janë persona që mund të kenë dijeni, apo persona që kanë pasur konflikte më parë me Buçin.
Janë hapur të gjitha dosjet që lidhen me Marselin, në mënyrë që të bëhet e mundur zbardhja e ngjarjes.
Vetë Buçi ka deklaruar në polici se dyshimet e tij janë tek Deizi Arapi, pasi ajo ka përmendur emrin e tij kur iu dogj makina e saj.
Zbardhja e ngjarjes vështirësohet pasi në atë zonë nuk ka kamera sigurie.
I ati i Marsel Buçit, Urim Buçi ka hedhur pak më parë akuza të drejtpërdrejta ndaj “gangsteres” së Bilishtit, Deizi Arapit e cila sipas tij është autore e kësaj ngjarjes që dyshohet se ka ardhur si hakmarrje.
Urim Buçi tha se Deizi Arapi ia ka akuzuar djalin për shkrumbimin e makinës së saj dhe se e ka sharë e ofenduar. Sipas Buçit, kjo gjë ka ndodhur dy ditë pas djegies së makinës së Arapit.
