Ndërkombëtarët e vendosur në Tiranë në daljet e tyre për mediat kur pyeten për punën e Prokurorisë Speciale Antikorrupsion përgjigjen se ecuria është pozitive duke kujtuar arrestimin e Sajmir Tahirit, por nuk ndajnë të njëjtin mendim me ta mbështetësit e Aleancës për Mbrojtjen e Teatrit.
Duke marrë në konsideratë se kallëzimin e parë në SPAK për çështjen e shembjes së Teatrit Kombëtar e kanë bërë 2 vite e 9 muaj më parë dhe organi i drejtësisë ende nuk ka çelur një hetim, AMT ka vendosur të nisë protestat.
Siç bëhet me dije në një njoftim të tyre në orën 10:00 të së mërkurë (12 Tetor) përpara dyerve të SPAK do të nisë tubimi, i cili pritet që të mos ndalet, por të jetë konstat në vijueshmëri.
Anëtarët e AMT kërkojnë gjithashtu mbështetjen e të gjithë qytetarëve, pa dallim përkatësie që të bëhen pjesë e kësaj proteste për të kërkuar drejtësi dhe për të vendosur para përgjegjësisë organet që u ngritën me shumë bujë në kuadër të reformës në drejtësi.
“Qytetarë të çdo lloj përkatësie! Bashkohuni në protestën e qëndrestarve të Aleancës për Mbrojtjen e Teatrit kundër mënyrës, se si SPAK reagon ndaj aferave ulëritëse korruptive”, është mesazhi i AMT.
“SPAK: Ndaje mendjen me mafian apo me qytetarët?!”, është pyetja që shtrohet dhe njëherësh slogani i protestës së paralajmëruar.
Kujtojmë se AMT ka depozituar në total në SPAK 16 kallëzime penale lidhur me çështjen e Teatrit Kombëtar, duke kërkuar nga organi i akuzës edhe arrestimin e kryebashkiakut të Tiranës, Erion Veliaj për shkeljet dhe terrorin që i hapi rrugë shembjes së godinës, por edhe për tenderin korruptiv që do të alokohet për ndërtimin e projektit të ri.
Një padi prej tyre në SPAK është dorëzuar edhe për ish-ambasadorin e BE-së në Tiranë, Luigi Soreca, të cilin e akuzojnë se ka tentuar që të ushtrojë ndikim te Gjykata Kushtetuese, për vendimin për çështjen e Teatrit Kombëtar.
SPAK asokohe iu kërkua të sekuestronte telefonat e Sorecës dhe Veliajt për të zbardhur “veprimet antiligjore”.
Ndërkohë, Këshilli Bashkiak i Tiranës dhe “timonieri” i kryeqytetit Erion Veliaj hapën vetëm pak ditë më parë garën për ndërtimin e Teatrit të ri.