Kjo javë për kryeministrin Edi Rama ka nisur me një takim “kokë më kokë” me ish-Presidentin Alfred Moisiu.
Shefi i qeverisë ka postuar në Facebook një foto ku shihet duke konsumuar kafe me Moisiun.
“Me Presidentin Moisiu, burim i pashtershëm urtësie”, shkruan Rama krahas fotos.
Në foto, duket që Rama dëgjon me shumë vëmendje këshillat e ish-kreut të Shtetit, ndërsa nuk dihen detaje nga biseda mes tyre.
Por nisur nga zhvillimet e fundit në vend dhe fluturimi drejt Hagës i ish-krerëve të shtetit, ndoshta biseda mes të dyve mund të jetë vërtitur rreth çështjes gjyqësore të ish-liderëve të UÇK-së, Hashim Thaçi e Kadri Veseli.
Gjithashtu nuk përjashtohet mundësia që kryeministri të ketë kërkuar këshilla, teksa ndodhet përballë betejës elektorale për zgjedhjet lokale të vitit 2023, por edhe për nismat që kërkonë të kalojë në Parlament si Amnistia Fiskale apo ligji për dosjet e ish-Sigurimit të Shtetit.
