Deputetja e Partisë së Lirisë, Erisa Xhixho ka akuzuar qeverinë se ka injoruar studentët duke mos i përfshirë në paketën e Rezistencës Sociale.
Deputetja bën me dije se i ka kërkuar ministres së Arsimit, Evis Kushi të shpjegojë arsyet e vendimit për të mos mbështetur me 100 euro në muaj studentët duke i lënë ata pa asnjë mbështetje.
Ajo thekson se plotësimi i kërkesave të studentëve do t’i kushtonte qeverisë pak më shumë gjysmë km rrugë me koncesion, ndaj ajo bën thirrje që qeveria, në vend që të shpërblejë klientët, të mbështesë studentët që sa vijnë e pakësohen në universitetet e vendit.
Postimi i plotë i Erisa Xhixhos:
Seancë urgjente pyetje-përgjigje me ministren e Arsimit për përjashtimin e studentëve nga paketa e Rezistencës Sociale !
Studentët janë injoruar nga qeveria, duke mos u përfshirë në paketën e Rezistencës Sociale.
Kërkesës së tyre të drejtë për një mbështetje financiare me 100 euro në muaj, nëpërmjet një peticioni online që mban 6 mijë firma drejtuar institucioneve përgjegjëse, kjo qeveri i është përgjigjur me injorim dhe asnjë vendimarrje.
Kriza e çmimeve, e cila ka dëmtuar ekonomitë e pjesës më të madhe të familjeve shqiptare, rëndon dukshëm te studentët, të cilëve kostoja e jetesës u është rritur, duke nisur me qiratë e banesave, karburantin, çmimet e ushqimeve të shportës, transportin etj.
Ata kërkojnë të trajtohen njësoj si studentët e Kosovës, të cilët u përfshinë në kategoritë e mbështetura financiarisht nga qeveria.
Mjerisht, qeveria Rama nuk bën dot sa qeveria Kurti, me një buxhet më të vogël se të Shqipërisë.
Ndaj, si deputete e Kuvendit, i kam kërkuar ministres së Arsimit të shpjegojë arsyet e këtij përjashtimi, me zero mbështetje për studentët e vendit.
Plotësimi i kërkesave të studentëve do t’i kushtonte qeverisë pak më shumë gjysmë km rrugë me koncesion.
Ndaj në vend që të shpërblejë klientët, kjo qeveri të mbështesë studentët që sa vijnë e pakësohen në universitetet e vendit!
Nuk mund të ndërtosh të ardhme nëse nuk mbështet arsimin, mësimdhënësit , studentët