Në studion e emisionit “Me Zemër të Hapur” u trajtua skandali i rëndë i rekrutimit të vajzave shqiptare si eskorta në Dubai nga agjencitë shqiptare.
Një nga vajzat që kishte aplikuar për këtë punë pa e ditur të vërtetën pas skemës së agjencive deklaroi se edhe pse kishte një diplomë të shkollës së lartë u josh nga paga që ofrohej për punë si kameriere apo hostess.
Vajza e cila ishte kurorëzuar edhe Miss në një kompeticion në Turqi tregoi se vajzave u kërkohej të kishin trupa të gjatë, pa tatuazhe e pa deformime apo shenja dalluese.
E reja tha se dyshimet e para lindën pasi ishte ajo që iu premtua ishte një shifër shumë e lartë. Ajo foli po ashtu për një vajzë të tretë e cila ndoqi të njëjtën rrugë rekrutimi dhe tani ka humbur çdo kontakt me familjarët pasi është nisur drejt Arabisë Saudite për të punuar si kameriere.
Vajza tha se pas komunikimit me vajzën që u nis drejt Arabisë tregonte se ishte tmerruar pasi kishte mbetur në një rreth vicioz nga i cili nuk e dinte nëse do të dilte.
Sipas saj vajza që ka “ngecur” ka probleme me dokumentacionin pasi që të largohet duhet të bashkëpunojë me agjensinë që e dërgoi.
Ndërkohë, e reja që i shpëtoi skemës tregoi si u ngritën pikëpyetjet e saj të para mbi mënyrën si realizohej rekrutimi nga agjencia me bazë në Tiranë.
Ajo u shpreh se dyshimet u shtuan pasi pyeti këtë agjenci nëse vajzat që aplikonin do të punonin së bashku dhe përgjigjja që mori ishte negative.
E reja shtoi se në këtë moment e kuptoi se ky ishte një mashtrim i agjencisë pasi vajzat nisen si punëtore normale kamariere apo hostess dhe përfundojnë si eskorta. Sipas saj vajzat u joshën nga paga e lartë që ofrohej e cila përllogaritej në rreth 2000 euro.
“Më janë shtuar dyshimet pasi pyeta agjencinë shqiptare nëse do jemi bashkë kur të nisemi dhe më thanë se do ndahemi, aty e kuptova se ishte mashtrim. Vajzat nisen si punëtore normale dhe përfundojnë si punëtore seksi. Të gjitha vajzat që aplikuan e kanë bërë vetëm për shkak të pagës”, u shpreh njëra nga vajzat.
