Cristiano Ronaldo festoi në një mënyrë të pazakontë pasi arriti një rekord historik duke shënuar golin e tij të 700-të në nivel klubesh, kundër Evertonit në “Gudison Park” mbrëmjen e sotme për t’i dhënë Manchester United fitoren 1-2 me përmbysje.
Ronaldo e nisi sërish në stol në Premierligë, por Ten Hag e hodhi në fushë vetëm 30 minuta pas startit të ndeshjes pas një dëmtimi të pësuar nga Anthony Martial.
Dhe superylli portugez shfrytëzoi në maksimum mundësinë e tij duke e çuar United në dhomat e zhveshjes me avantazhin e 1 goli, pasi me këmbën e majtë mposhti Jordan Pickford.
Por ajo që rrëmbeu vëmendjen e fansave ishte festa e pazakontë, me CR7 që “harroi SIU-n e famshëm, për një stil të ri ku ju bashkëngjit edhe braziliani Antony.
Që të dy qëndruan së bashku pranë flamurit të këndit dhe kryeqëzuan duart me njëra-tjetrën dhe mbyllën sytë si për të treguar se u lehtësuan nga një barrë e rëndë.
Festimi i ri nuk ka ende një emër, por nëse Ronaldo vijon të luajë dhe të shënojë me United mund të ketë një në javët e ardhshme.
Ndërkohë, spekulimet rreth të ardhmes së tij janë ende të përhapura, me raportimet e fundit që shohin “Inter Miami” e David Beckham si favorit për të nënshkruar me 37-vjeçarin në afatin kalimtar të janarit.
