Tre persona kanë vdekur si pasojë e një shpërthimi në County Donegal, ka thënë Gardaí (policia irlandeze). Ngjarja ndodhi në një pikë karburanti Applegreen në fshatin Creeslough të premten pasdite.
Sipas BBC, Një numër personash po trajtohen për lëndime. Më herët Pearse Doherty, tha se kishte ende njerëz të bllokuar. Gardaí tha se ishte një operacion në vazhdim dhe ata nuk ishin në gjendje të jepnin më shumë informacion mbi viktimat në këtë moment.
Në një deklaratë, Spitali Universitar Letterkenny tha se kishte të bënte me “një incident serioz që përfshin njerëz të shumtë të plagosur që kërkojnë vëmendje të menjëhershme”. Ai tha se kishte kaluar në “gadishmëri të madhe emergjente” ndërsa u mor me incidentin.
“Ne po i bëjmë apel publikut që të mos vijnë në Departamentin e Emergjencave nëse nuk është një rast urgjent. Ju lutemi kontaktoni mjekun tuaj të përgjithshëm ose shërbimin e doktorit TANI në radhë të parë,” shtohet në deklaratë.
Creeslough është një fshat i vogël në Republikën e Irlandës dhe është rreth 15 milje nga Letterkenny dhe 30 milje nga kufiri me Irlandën e Veriut.
Në një deklaratë në Twitter, kompania Applegreen tha se lajmi ishte “shkatërrues”.
“Mendimet dhe lutjet tona janë me familjet dhe miqtë e të ndjerit, me ata që janë plagosur dhe me komunitetin më të gjerë të Creeslough”, shkruan ata në Twitter.
Taoiseach (Kryeministri irlandez) Micheál Martin shprehu ngushëllimet e tij për familjen dhe miqtë e atyre që kishin vdekur dhe për të gjithë komunitetin e Creeslough, në këtë “ditë më të errëta për Donegal dhe të gjithë vendin”.
