Propozimet për ligjin e ri të Dosjeve nuk kanë munguar as nga Partia Demokratike e drejtuar nga Sali Berisha, as nga grupi i deputetëve që qëndrojnë pranë Enkelejd Alibeajt dhe as nga PS në pushtet që do t’i “djegë” karrierën politike Ilir Metës me një draft që rrëzon certifikatat e dhëna nga komisionet Bezhani dhe Mezini.
Pavarësisht se 3 projektligje të propozuara mbeten aktive, në Komisionin e Ligjeve ka vijuar sot mbledhja e dytë për shqyrtimin në detaje të draftit që mazhoranca kërkon me ngulm të kalojë në Parlament, e shtyrë nga publikimi i dosjes për agjentin I.M.
Ligji synon të lërë jashtë politikës ata të cilët kanë qenë bashkëpunëtorë të Sigurimit të Shtetit, por grupi i Alibeajt nuk mendon njëlloj si mazhoranca, pasi gjatë shqyrtimit nen për nen kanë shprehur rezerva për shtresat që do të prekë ligji.
“Ajo që PS kërkoi është se certifikatat e pastërtisë, Mezini dhe Beazhni nuk vlejnë”, tha deputetja Ermonela Felaj.
Por demokratët kërkojnë shtrirje më të gjerë të efekteve vepruese të ligjit, duke argumentuar se dosjet duhet të hapen dhe të gjithë qytetarët të mund të kenë qasje, kur u nevojitet diçka e tillë.
“Ne nuk kemi hyrë në këtë proces vetëm për këtë, Bezhani dhe Mezini. Të tjerat janë rregullime teknike. Nëse ju mendoni se ne jemi këtu për rregullime teknike, ne nuk kemi ardhur për rregullime teknike”, tha demokrati Gazment Bardhi.
“Modeli i ligjit shqiptar, vjen nga ai gjerman, që ka një kanal shumë të mirë, nuk do të thotë që të jesh kërkues me kërkesë me grada. Por çdo njeri që ka interes të vetëm të thotë çfarë pyetje kërkimore ka, barrierat janë çliruar, ka liri për çdo njeri”, shtoi deputeti Dashnor Sula.
Por, socialistët u mbrojtën duke thënë se dosjet do u hapen të afërmve që kanë pasur njerëz të prekur në sistemin e kaluar dhe gjithashtu studiuesve. “Të afërmit do i shikojnë dhe për qëllime studimi dhe media”, ishte argumenti i PS.
Por pavarësisht kësaj, deputetët demokratë ia bënë të qartë se në mbledhjen e ardhshme kur pritet të miratohet projektligji, ata do të votojnë kundër nëse kërkesat e PS vazhdojnë të jenë të tilla për të goditur një person me pushtet politik në veçanti, duke iu referuar indirekt kryetarit të PL, Ilir Meta.
“Ligjin për një individ, nuk e votojmë. Nëse doni të bëni pis këtë temë, të hapen dosjet. Paskan ardhur këtu anëtarët e autoritetit që të mbajnë dosjet e mbyllua, në këtë teatër”, nënvizoi Gazment Bardhi.
Në këto kushte, PS do t’i duhet më shumë punë për të bindur grupin e Alibeajt, pasi vota e demokratëve është e domosdoshme. Kjo pasi, ligji që prek spiunët e ish-Sigurimit, mund të miratohet vetëm me 84 vota pro në Parlament.
