Presidenti turk Rexhep Taip Erdogan si rrallëherë është shfaqur i vetmuar, ose të paktën ka qëndruar në shoqërinë e delegacionit të mbërritur nga Ankaraja në Pragë.
Kjo jo një zgjedhje me dëshirë e liderit kontrovers turk, por më tepër një mesazh izolimi që vendet e Bashkimit Europian indirekt ia kanë transmetuar në margjinat e takimit për ngjizjen e Komunitetit Politik Evropian.
I ndodhur në qendër të rrethit të akuzave nga Perëndimi për lidhjen e fortë më Rusinë dhe dëshirën për të blerë raketa nga Putin, por edhe për shkak të gjuhës së ashpër dhe retorikës së përdorur në drejtim të Greqisë, Erdogan duket se është izoluar.
Të paktën këtë të lë të kuptosh pozicionimi i tij në foton zyrtare të 40 liderëve të vendeve që ndodhen në kontinentin europian, por edhe mungesa e takimeve “kokë më kokë” mes tij dhe krerëve të BE-së.
Këtë të enjte pasdite, liderët morën pjesë në katër tryeza të rrumbullakëta; dy për klimën dhe mjedisin, dy për paqen dhe sigurinë, ndërsa darka e sotme shihet se një mundësi për të paraqitur idetë dhe për çështjet që i shqetësojnë të gjithë, ku nuk përjashtohet as thirrja e Rusisë për përdorim të armëve bërthamore dhe me kuriozitet pritet qëndrimi i Turqisë.
Ndërkohë janë planifikuar disa takime dypalëshe, trepalëshe dhe katërpalëshe, veçanërisht në përpjekje për të zbutur mosmarrëveshjet mes disa prej pjesëmarrësve.
Emmanuel Macron takohet me liderët e Armenisë dhe Azerbajxhanit, pastaj me presidenten e Kosovës Vjosa Osmani, me kancelarin gjerman Olaf Scholz dhe Presidentin e Serbisë Aleksandër Vuçiç që ia ka shprehur hapur dashurinë Moskës, e më pas sërish me kancelarin gjerman.
Por ajo që vihet re është një distancë e qartë e kryeministrit grek Kyriakos Mitsotakis dhe Erdogan, të cilët në mbledhjet e mëparshme të NATO-s apo samite ndërkombëtare, pavarësisht përplasjeve ishin ulur të diskutonin së bashku.
Këtë herë Mitsotakis ka refuzuar të takohet me presidentin turk dhe karakteristikë e klimës së “ngrirë” është se edhe në foton familjare të Sinodit informal të Pragës, distanca mes tyre ishte e madhe.
Mitsotakis u pozicionua pranë kryeministres britanike Liz Truss dhe larg Erdoganit, i cili qëndroi në qendër në të djathtë dhe katër vende pranë presidentit të Republikës së Qipros, Nicos Anastasiades.
Dy liderët nuk kanë shkëmbyer as një shikim, ndonëse në një moment presidenti turk ka kaluar para kryeministrit grek, ndërsa britanikja “The Times” shkruan një artikull: “Kush dëshiron të ulet pranë Erdoganit në darkën e Pragës? Askush…”.
Por, pavarësisht kësaj duket se miku i tij i afërt, kryeministri hungarez Viktor Orban e ka përshëndetur dhe madje është ulur në tryezën e rezervuar për delegacionin turk, ndërkohë që pas shkrepjes së fotos zyrtare Erdoganit i është afruar edhe kryeministri shqiptar Edi Rama.
Pavarësisht se shpesh është kritikuar për raportin e ngushtë dhe miqësor që ka me Erdogan, Rama nuk ka nguruar të dalë jashtë linjës së liderëve të BE, ndoshta edhe nën presion prej faktit se “baba” Erdogani do t’i dhurojë Shqipërisë, dronët “Bayraktar”, për të cilët kryeministri mburret në çdo dalje ku flet për Forcat e Armatosura.
Kujtojmë se së fundmi Rama ka qenë edhe në qendër të kritikave për shkak të mbylljes së dy kolegjeve turke “Mehmet Akif” dhe “Turgut Ozal” që operonin prej më shumë se 25 vitesh në vendin tonë, një vendim ky që besohet se është marrë pas kërkesës së vazhdueshme të Erdogan për të goditur financimet e Fejtullah Gylen në Shqipëri.
Nuk ka informacion nëse Rama dhe Erdogan do të kenë një takim dypalësh në kryeqytetin çek, por lidhja e tyre e afërt nuk është hedhur asnjëherë poshtë.
