Deputetja e Partisë Demokratike, Jorida Tabaku ka mbështetur protestën e pedagogëve. Tabaku ka renditur tre arsye që sipas saj tregon se parajsa e premtuar rezultoi gënjeshtër, cilësia e jetës për pedagogët është e ulët dhe po shkatërrohet sistemi i kërkim-zhvillimit.
“Së pari, tregon të vërtetën në lidhje me Arsimin e Lartë Publik dhe dështimin e Reformës në Arsim që prodhoi një sistem arsimor më të dobët dhe inefektiv. Parajsa e premtuar rezultoi një gënjeshtër e madhe, cilësia në rritje rezultoi në më pak studentë në auditore.
Së dyti, cilësia e jetës për shtresën e pedagogëve është gjithnjë edhe më e ulët. Ata janë pjesë e shtresës së mesme dhe qytetarëve të angazhuar që përbuzen dhe keqtrajtohen nga një mazhorancë që sistematikisht ka sulmuar këtë shtresë. Largimi i shqiptarëve sot është shenjë e kësaj dobësie.
Së treti, shkatërrimi i sistemit të kërkim-zhvillimit që përkthehet në adaptimin e ekonomisë sonë me sfidat edhe risitë e reja teknologjike. Nuk është rastësi që “biznesi” vetëm i mirë është ai i ndërtimit dhe jemi pas në manifakturë, teknologji, zhvillimin e programeve kompjuterike”, shkruan Tabaku në FB.
Tabaku shton se nuk mund të jemi një shoqëri e moralshme nëse nuk respektojmë dinjitetin e pedagogëve
“Nuk do të mund të kemi një Shqipëri të shqiptarëve nëse nuk kemi një vend që trajton shtresën e mesme duke i dhënë shanse dhe mundësi! Nuk mund të jemi një komb i suksesshëm nëse nuk kemi një shoqëri që ofron mobilitet social. Nuk mund të jemi një shoqëri e moralshme nëse nuk respektojmë dinjitetin e pedagogëve”, përfundon Tabaku.
Pedagogët siç kishin paralajmëruar në mungesë të arritjes së dakordësisë me Ministrinë e Arsimit sa i përket kërkesave të tyre për rritje pagash dhe shtim të financimit për kërkime shkencore, kanë dalë sot në protestë.
Ftesës së Sindikatës së Pedagogëve i janë përgjigjur pozitivisht edhe pedagogët e universiteteve në rretheve, të cilët i janë bashkuar protestës.
&
