“Duhet të ikësh nga shtëpia, nuk të duroj dot, s’do shpëtosh gjallë, do ta përplas kokën pas murit”. Shqiptari 38 vjeçar, i cili jetonte së bashku me gruan e tij në qytetin e Belluno në Itali, ia kishte kthyer jetën asaj në një makth të vazhdueshëm.
Pas muajve të tërë dhune, të kryera shpesh nën ndikimin e alkoolit, si dhe në prezencën e vajzave të tyre të vogla, 33-vjeçarja, e cila po ashtu është shqiptare gjeti guximin për t’u rebeluar dhe denoncoi dhunën e ushtruar nga bashkëshorti i saj.
Pas denoncimit shqiptarit i është dashur të përgjigjet para ligjit për dhunën në familje. Për këtë çështje është ekzaminuar periudha nga janari 2020 deri në Janar 2021. 38-vjeçari ka humbur kontrollin pasi ka pirë dhe ka fyer gruan e tij për origjinën e saj nga veriu i Shqipërisë.
Në fillim gruaja është munduar ta largojë burrin nga pirja e alkoolit, por ai e ka kërcënuar, e ka kapur nga kyçet dhe e ka tërhequr, ndaj në 9 Tetor 2020, në orën 9 të mëngjesit, gruaja e frikësuar nga reagimet e bashkëshortit të saj ka kërkuar ndihmën e policisë.
Ardhja e agjentëve të policisë i ka qetësuar ujërat, por vetëm për disa orë më pas “ferri u rikthye”. Këtë herë burri ka hedhur një shishe në drejtim të gruas dhe më pas e goditi atë në ballë duke i bërtitur: “Largohu, zhduku, do të bëj copash!” Kështu në po të njëjtën ditë, në orën 19:40 pasdite, policia mori një tjetër telefonatë dhe shkoi të ndërhynte për ta qetësuar burrin.
Sipas informacioneve atë ditë gruaja e tmerruar u transferua në një strehë, por makthi nuk mbaroi. Shqiptari vazhdoi ta përndiqte duke e telefonuar e duke i dërguar mesazhe kërcënuese. “E shkreta ti, po nuk u ktheve!”, mesazh i datës 22 Tetor. “Nuk ke për të jetuar më!”, mesazh i dërguar më 23 Tetor. ”Edhe nëse shkoj në burg të lëndoj, burgu është më mirë se të rri këtu vetëm!”, i dërguar në 11 Nëntor.
Për t’i bërë kërcënimet e tij më të besueshme bënte sikur e dinte vendodhjen e saj dhe i thoshte se do shkonte ta merrte. Në 26 Tetor ai e mori me video call, në këtë moment gruaja ka thënë se do të vrasë veten, ndërsa ai i ka thënë se nëse ndonjë mashkull tjetër do shfaqet në jetën e saj, ajo do vuajë pasojat.
Gjatë Krishtlindjeve u duk se ‘stuhia’ u zhduk, por ishte vetëm një ‘armëpushim’. Në janar të vitit 2021, 38-vjeçari u zhvendos pranë strehës ku jetonte gruaja me vajzat e vogla. Ai kishte shkuar dhe i kishte rënë ziles në shtëpinë e tyre duke kërcënuar se nëse nuk do e hapnin derën ai do thyente dritaren. Gruaja e dinte se nëse do dilte ai do ta lëndonte ndaj ka thirrur përsëri policinë për të mbrojtur veten dhe të bijat.
Ditën e djeshme 4 Tetor 2022, para gjykatës doli edhe eksperti i cili konfirmoi se abuzimi me alkoolin nuk i ul aftësinë e të kuptuarit 38-vjeçarit. Gjykatësja Angela Feletto i dha burrit dënimin me 2 vite burg e po ashtu atij i duhet të paguajë 7 mijë euro kompensim gruas së tij.
