Anëtari i Këshillit Kombëtar të PD, Ilir Alimehmeti, ka komentuar skandalet e qeverisë dhe aksionin opozitar.
I ftuar në emisionin e pasdites në Syri Tv, Alimehmeti shprehet se zgjedhjet vendore janë sfida e parë reale elektorale e koalicionit opozitar kundrejt një regjimi që ka kapur gjithçka, çdo institucion.
“Duhet një ndryshim radikal, hapje jo vetëm ndaj aleatëve, por edhe ndaj simpatizantëve, shtresës gri, popullit, për të arritur në një koalicion parazgjedhor sepse duhet të jemi gati në momentin e primareve këto biseda duhet të jenë të konkluduara. S’mund të shkosh në primare para se të kesh mbaruar punët brenda shtëpisë, koalicionit. Këtu mund të shkojmë me një front të gjerë, përtej logjikës të djathtë dhe të majtë.“-tha Alimehmeti.
Më tej ai u shpreh se duhet të dalim nga një ngërç i madh, një kurth ekonomik dhe një situateë dëshpëruese shpopullimi, që janë pasojat e regjimit të Edi Ramës.
“Kjo s’prek vetëm anëtarët e PD-së, por shtrenjtimi i çmimit të energjisë elektrike i prek të gjithë. Elementi kyç është shoqëria civile, të gjithë kundër një regjimi që na sjell në një ditë dëshpëruese.”-u shpreh Alimehmeti.
Sa i përket aksionit të Partisë Demokratike, Alimehmeti deklaroi se kishin një aksion të parë të madh në protestën e 7 korrikut, që ishte një matje dhe një demonstrim i bashkimit ndërsa shtoi se duhet të ngrihen për protesta me një kauzë, duke kushtëzuar qeverinë.
“Duhet ta detyrojmë regjimin me kushte, jo vetëm me paraqitje për të treguar sa jemi. Ne e dimë mbështetjen. Kemi pedagogët që protestojnë, ka të bëjë me cilësinë e studentëve.
Janë në funksion të studentit dhe zhvillimit të vendit. Nevojat e shoqërisë civile, nevoja ekonomike, energjetikës, i shkohet me kërkesa konkrete palës në fuqi duke e kushtëzuar, duke përshkallëzuar veprimin nga protesta në protestë, drejt ngritjes së aksionit.”-tha anëtari i Këshillit Kombëtar të PD.
Sa i përket primareve dhe takimit të sotëm Berisha-Meta në selinë blu, Alimehmeti deklaroi se duhet të kenë një emërues të përbashkët.
“Mekanizmi shumë transparent dhe i qartë i bërjes së primareve. Mund të ketë diskutime për një zonë të caktuar, për specifika, një nga partitë e koalicionit ndoshta ka një kandidat apo një situatë të favorshme, ama dhe ata duhet të bëjnë primare.
Për herë të parë kemi primare të hapura. Jemi shumë pro hapjes 100 për qind të hapjes së primareve. Ky është një shans shumë i mirë, mbështetemi tek vota e lirë, vota e ndershme, shprehja e dëshirës së qytetarit.”-u shpreh Alimehmeti.
Alimehmeti deklaroi se Partia Demokratike ka shumë punë për të bërë përpara ndërsa shtoi se gjithçka po jepet me votë.
“Kur flasim për primare, shkojmë përtej interesit të partisë, po flasim për një qytetar. E vetmja mënyrë është angazhimi. Qytetari të shprehë vullnetin e tij, jo një herë në katër vite me persona të imponuar, se e pamë ku të çon ajo rrugë.”-tha Alimehmeti.
